अकोला - अकोल्यातील अष्टपैलू खेळाडू दर्शन नळकांडे आणि डावखुरा शैलीदार फलंदाज अथर्व तायडे यांची सलग तिसऱ्या वर्षी आयपीएल संघात निवड झाली आहे. दोघांनाही गतवर्षीच्या संघाने कायम ठेवले आहे.

क्रिकेट क्लब व विदर्भ क्रिकेट संघटनेचा मध्यमगती गोलंदाज व आक्रमक फलंदाज असा अष्टपैलू क्रिकेट खेळाडू दर्शन नळकांडे व सलामीला खेळणारा डावखुरा फलंदाज अथर्व तायडे हे अनुक्रम गुजरात टायटन व किंग्स इलेवन पंजाब संघाकडून संघात आहे. या महिन्यात दुबई येथे आयपीएलचा लिलाव होणार आहे. तत्पूर्वी ता. १५ नोव्हेंबरला संघातील कायम ठेवण्यात आलेल्या खेळाडूंची यादी फ्रँचायझींकडून जाहीर करण्यात आली.

दर्शनची आयपीएल स्पर्धेकरिता सहाव्यांदा निवड झाली असून, यापूर्वी मागील तीन स्पर्धांमध्ये दर्शनने किंग्स इलेवन पंजाब संघाकडून प्रतिनिधित्व केले आहे. मागील दोन स्पर्धांपासून तो गुजरात टायटन संघाकडून प्रतिनिधित्व करीत आहे.

दर्शनने यापूर्वी वयोगट १४, १६, १९, २३ स्पर्धेत विदर्भ तथा मध्यविभाग संघाचे प्रतिनिधित्व केले असून, १९ वर्षीय भारतीय संघाकडून इंग्लंड येथे कसोटी सामना तर आशिया कप करिता मलेशिया येथे १९ वर्षीय भारतीय संघाचे प्रतिनिधित्व केले आहे. सहा वर्षांपासून रणजी ट्रॉफी संघाचे प्रतिनिधित्व करित आहे.

मागील सिझनमध्ये दर्शनने मुश्ताक अली टी-२० स्पर्धेत कर्नाटक विरुद्ध खेळताना चार चेंडूत चार बळी घेवून भारतातला दुसरा तर जगातील नववा गोलंदाज होण्याचा विक्रम केला होता.

अथर्व तायडे याला तिसऱ्यांदा पंजाब संघाकडून आयपीएल स्पर्धेत प्रतीनिधित्व करण्याची संधी मिळाली आहे. मागीलवर्षी त्याने चांगल्या फलंदाजीचे प्रदर्शन केले. अथर्व तायडे याने यापूर्वी १६, १९, २३ वर्षाखालील विदर्भ व मध्य विभाग संघाचे प्रतिनिधित्व तसेच १९ व २३ वर्षाखालील भारतीय संघाचे प्रतिनिधित्व केले आहे.

रणजी ट्रॉफी व इराणी ट्रॉफी संघाचे प्रतिनिधित्व केले असून, अथर्वच्या नेतृत्वात विदर्भ संघ १९ वर्षीय स्पर्धेत अजिंक्य राहिला आहे. विशेष बाब म्हणजे, यावर्षी अथर्वकडे मुश्ताक अली व विजय हजारे स्पर्धेत विदर्भ संघाच्या कर्णधार पदाची जबाबदारी असून, दोन्ही खेळाडूनी मुश्ताक अली व विजय हजारे स्पर्धेत चांगले प्रदर्शन केले आहे.