अकोला : शहरातील लहरियानगर परिसरातील एका सेवानिवृत्त नागरिकाला फेसबुक फ्रेंड रिक्वेस्ट पाठवून पैशाची मागणी करीत ५६ लाखांची फसवणूक करण्यात आली. याप्रकरणी नायजेरियन नागरिकाला अकोला सायबर पोलिसांच्या मदतीने अटक करण्यात आली. हरिसन इंगोला (३५ रा. डेल्टा सिटी) अशी अटक करण्यात आलेल्या आरोपीचे नाव आहे.

मोहात पडून ५६ लाख गमाविण्याची वेळ आलेले आत्माराम रामभाऊ शिंदे यांनी खदान पोलिस स्टेशनला दिलेल्या फिर्यादीनुसार, त्यांना फेसबुकच्या माध्यमातून फ्रेंड रिक्वेस्ट पाठवून मोहात अडकविले. ड्युटी ऑफिसर असल्याचे सांगून मदत करणार असल्याचे सांगण्यात आले. या माध्यमातून भारतातील काही नागरिकांच्या मदतीने बोलून पाठवण्यात आलेल्या पार्सलच्या अनुषंगाने काही रक्कम भरण्याचे सांगण्यात आले. यामध्ये त्यांच्याकडून टप्प्याटप्प्याने ५६ लाख रुपये उकळण्यात आले.

आपली फसवणूक झाल्याचे लक्षात येताच त्यांनी थेट खदान पोलिस स्टेशन गाठून फ्रेंड रिक्वेस्ट पाठवणारा रॅपगस्ट सुजी, रिधी गुप्ता (रा. आनंदापूर कोलकाता), आशिष कुमार (कॅनरा बँक नवी दिल्ली), नसीमुद्दीन (रा. राजाजी नगर बेंगरूळ), सिबानू कायपेंग (रा. पेरांबूर केरळ), इम्रान हुसेन (रा. बेंगरूळ), सोबीनोय चकमा (रा. जमना नगर गुजरात), रमलज्योती चकमा (रा. एमजी रोड बेंगरूळ), अशोक (रा. दिल्ली), अँथनी (रा. सिरिया) या १० आरोपी विरोधात तक्रार दिली. या फिर्यादीवरून खदान पोलिसांनी ता. ४ जुलै २०२१ रोजी आरोपी विरोधात गुन्हे दाखल करून तपास सुरू केला. या तपासादरम्यान सायबर पोलिसांच्या मदतीने व तांत्रिक मदतीने पोलिसांनी मुंबई येथून हरिसन इंगोला या नायजेरियन आरोपीला अटक केली.