वाशीम : अनैतिक संबंधात अडसर ठरतो, म्हणून खून करून पुरावा नष्ट करण्याच्या प्रकरणी आरोपी गोपाल शेषराव पाटील यास आजन्म कारावास व १ हजार रुपये दंडाची शिक्षा मंगरुळनाथ जिल्हा व सत्र न्यायालयाने ठोठावली.

याबाबतची माहिती अशी की, ३० नोव्हेंबर २०१२ रोजी सायंकाळी ६ वाजता त्यांचा मुलगा अजय महादेव खडसे हा शेतावर कामावर जातो असे म्हणून घरून निघून गेला. मात्र, तो परत न आल्याने शेतात व आजुबाजूला पाहणी केली असता तो आढळून आला नाही. १ डिसेंबर २०१२ रोजी श्याम बाहेती यांच्या शेतातील विहिरीत अजयचा मृतदेह आढळून आला. याबाबतची तक्रार अजयचे वडील महादेव शेषराव खडसे यांनी २ डिसेंबर २०१२ रोजी दाखल केली.

या प्रकरणाचा सखोल तपास केला असता आरोपी गोपाल शेषराव पाटील याने अजय खडसे हा अनैतिक संबंधात अडसर ठरत असल्यामुळे त्याचा खून केला व पुरावा नष्ट करण्याच्या उद्देशाने विहिरीत ढकलल्याचे तपासात समोर आले. विशेष म्हणजे या प्रकरणात मृताचे वडील महादेव खडसे यांनी केली असली, तरी तपासात ती तक्रार वडिलांनी नव्हे तर, पोलिसांची दिशाभूल करण्यासाठी त्यांच्या नावाने गोपाल शेषराव पाटील याने केल्याचेही तपासात आढळून आले.

या गुन्ह्याचा तपास पोलिस निरीक्षक दोनकलवार यांनी करून न्यायालयात दोषारोपपत्र दाखल केले. सरकार पक्षाच्या वतीने ११ साक्षीदाराची साक्ष नोंदविण्यात आली. याप्रकरणी आरोपीस आजन्म कारावासाची शिक्षा ठोठावण्यात आली. याप्रकरणी सरकार पक्षातर्फे अॅड. जी. डी. गंगावणे यांनी काम पाहिले.