अकोला : काटेपूर्णा प्रकल्पावरील महान धरणाच्या पाणलोट क्षेत्रात गेल्या २४ तासांत ७६ मिलीमीटर पाऊस झाल्याने धरणाची पाणी पातळी एका दिवसांत २१ टक्क्यांनी वाढली. मंगळवारी सायंकाळी प्रकल्पामध्ये ५० टक्के साठा होता तो आज बुधवारी वाढून ७१.११ टक्क्यांवर पोहोचला आहे.

हा जलसाठा पाहता अकोला शहरासह मूर्तिजापूर व ६४ खेडी गावांची वर्षभराची तहान भागली आहे. आगामी पावसाचे दिवस लक्षात घेता सिंचनासाठी पाणी उपलब्ध होण्याची सुचिन्हे दिसू लागली आहेत.

अकोला शहराला पाणी पुरवठ्यासाठी वर्षभराकरिता २४.०४ दलघमी एवढे पाणी लागते. तर याच काटेपूर्णा प्रकल्पावर अवलंबून असणाऱ्या ६४ खेडी पाणीपुरवठा योजनेसाठी ७ दलघमी पाण्याची गरज आहे. आजच्या स्थितीत धरणातील साठा ६१.४०९ दलघमी आहे. पिण्याच्या पाण्याचे आरक्षण वजा जाता ३२ दलघमी पाणी शिल्लक उरते.

त्यामुळे सिंचनासाठी पाणी मिळणार आहे. काटेपूर्णा धरण क्षेत्रात आजपर्यंत एकूण ४१६ मिलीमीटर पाऊस झालेला आहे. मंगळवारी रात्रभरात ७६ मिलिमीटर पाऊस झाल्याने धरणात आजच्या स्थितीत ६१.४०९ दलघमी साठा उपलब्ध आहे.

पाणलोट क्षेत्रात पाऊस

धरणाच्या पाणलोट क्षेत्रामध्ये पाऊस सुरू असून धरणाच्या सुरक्षेच्या दृष्टीने सायंकाळी ५ वाजता प्रकल्पाचा दरवाजा ५ से.मी ने उघडण्यात आला आहे. प्रकल्पातून ४.१० क्यूमेक्स वेगाने पाण्याचा विसर्ग सुरु आहे.नदी काठच्या गावांतील नागरिकांनी सावध राहावे तसेच नदी पात्र ओलांडू नये, असे आवाहन दगडपारवा प्रकल्प पूर नियंत्रण कक्षाच्या वतीने करण्यात आले आहे.

‘दगडपारवा’चा एक दरवाजा उघडला

दगडपारवा लघु प्रकल्पाची पाणी पातळी ३१६.७० मीटर असून, त्याचा साठा ८.२६ दलघमी त्याची टक्केवारी ८१.०५ आहे. दगडपारवा प्रकल्पाच्या मंजूर जलाशय परिचालन सुचीनुसार प्रकल्पामध्ये जुलै अखेर ७९.९१ टक्के पाणीसाठा असणे निर्धारित आहे.