अकोला : मनसेचे दिवंगत कार्यकर्ते जय मालोकार यांच्या कुटुबियांची भेट घेण्यासाठी जात असताना मनसे नेते अमित ठाकरे यांच्या ताफ्यातील गाडीचा अपघात झाल्याची घटना समोर आली आहे. अमित ठाकरेंचा ताफा समृद्धी महामार्गावरून मालेगाव येथून अकोल्याकडे येताना ताब्यातील गाड्या एकमेकांवर आदळल्या आहेत.

समृद्धी महामार्गावर खाली उतरल्यानंतर अकोल्याकडे येतांना मनसे नेते अमित ठाकरेंच्या पातुरजवळील भंडारज फाट्याजवळची घटना. सुदैवाने कुणालाही कोणतीही दुखापत नाही. अमित ठाकरे हे मनसैनिक जय मालोकार यांच्या कुटुंबीयांना भेटण्यासाठी त्यांच्या गावाकडे जात होते.

नेमकं झालं काय होतं?

उपमुख्यमंत्री अजित पवार यांच्या धरणाबाबतच्या जुन्या वक्तव्यावरुन राज ठाकरे यांनी अजित पवारांवर टीका केली होती. राज ठाकरे यांच्या टीकेला प्रत्युत्तर देताना अमोल मिटकरी यांनी राज ठाकरे यांचा उल्लेख 'सुपारीबाज' असा केला होता. त्यांच्या या वक्तव्यानंतर मनसे कार्यकर्ते आक्रमक झाले आणि अकोल्यात अमोल मिटकरी यांची गाडी फोडली. गाडी फोडल्यानंतर मनसेचे नेते जय मालोकर यांना अस्वस्थ वाटू लागलं. त्यामुळे त्यांना अकोल्यातल्या खासगी रुग्णालयात दाखल केलं होतं. मात्र उपचारादरम्यान त्यांचा मृत्यू झाला.

आमदार अमोल मिटकरी यांच्या गाडीची तोडफोड केल्या प्रकरणी मनसेच्या १३ पदाधिकाऱ्याविरुद्ध गुन्हे दाखल करण्यात आले आहेत. यापैकी जय मालोकार या कार्यकर्त्याचा मृत्यू झाला

जय मालोकार यांच्या मृत्यूनंतर राज्यभरातून हळहळ व्यक्त केली जात आहे. दरम्यान मालोकार यांच्या कुटुंबियांची भेट घेण्यासाठी आज मनसे नेते अमित ठाकरे अकोल्यात दाखल झाले आहेत. मुंबई ते अकोला प्रवासादरम्यान त्यांच्या ताफ्यातील गाडीला अपघात झाला.