देऊळगाव राजा : कांदा सीड्सचे जर्मिनेशन झाले नाही, म्हणून शेतकऱ्यांना कार्यालयाचे खेटे मारावयास लावणारी ईस्ट अँड वेस्ट सीड्स कंपनीने अखेर ठिय्या आंदोलनकर्ते शेतकऱ्यांच्या खात्यात पैसे टाकले. अन् शेतकरी नेत्यांसह दैनिक सकाळच्या बातमीची दखल सीड्स कंपनीला घ्यावी लागली.

कांदा सीड्स देऊन सहा महिने उलटले तरीही ईस्ट अँड वेस्ट कंपनीने शेतकऱ्यांच्या कांदा बियाणांचा जर्मिनेशन केले नाही. म्हणुन बुधवारी रामनगर, वाढवणा, नांदखेडा, काचनेरा, गारखेड, भरोसा येथील शेतकऱ्यांनी शेतकरी नेते विनायक सरनाईक, माजी सरपंच संतोष भुतेकर, उद्धव थूट्टे,तानाजी चिकणेसिद्धेश्वर होरकळ, मधुकर उसर, संतोष थुट्टे, बद्रीनाथ तावरे आदी शेतकऱ्यांनी कंपनीच्या कार्यालयात ठिय्या मांडला.

शेतकरी नेत्यांचे आंदोलन आणि एकमेव दैनिक सकाळने शेतकऱ्यांच्या सदर आंदोलना बाबत सविस्तर व परखडपणे वृत्त प्रकाशित केले. याची दखल घेत ईस्ट अँड वेस्ट कंपनीने आंदोलनकर्ते १७ शेतकऱ्यांना ३ लाख ८० हजार रुपये अदा केले. दरम्यान आंदोलनकर्ते शेतकऱ्यांच्या खात्यात पैसे आल्याने कांदा उत्पादक शेतकऱ्यांनी समाधान व्यक्त केले आहे.

कंपनीने तालुका व परिसरातील बाराशे शेतकऱ्यांना कांदा सीड्स प्लॉट दिले होते. त्यांच्याकडून कांदा सीड्स घेऊन जर्मिनेशन ला पाठविण्यात आले.आंदोलनकर्ते सर्व शेतकऱ्यांना कांदा सीड्स बद्दल रक्कम अदा करण्यात आली. कंपनीने सुमारे ९०% कांदा उत्पादक शेतकऱ्यांना पैसे दिले असून उर्वरित शेतकऱ्यांना येत्या ५ ऑक्टोबर पर्यंत पूर्णतः रक्कम करारानुसार कंपनी अदा करणार आहे.

- भागवत पवार, एरिया मॅनेजर, ईस्ट अँड वेस्ट कंपनी, शाखा देऊळगाव राजा