जालना : बुलडाणा अर्बन को-ऑपरेटिव्ह क्रेडिट सोसायटीच्या शहागड (ता.अंबड, जि. जालना) येथील शाखेवर तिघा शस्त्रधाऱ्यांनी गुरुवारी (ता.२८) सायंकाळी फिल्मी स्टाइल दरोडा टाकला. सुमारे २५ लाख रुपये रोख, तारण म्हणून ठेवलेले सुमारे एक कोटीचे सोने लुटल्याचा प्राथमिक अंदाज आहे. तिघांनी केवळ पंधरा मिनिटांत शाखा साफ केली.

क्रेडिट सोसायटीच्या शाखेचे व्यवहार बंद करत असताना सायंकाळी पाचच्या सुमारास तिघे शाखा कार्यालयात घुसले. त्यांनी पिस्तुलाचा धाक दाखवून सात कर्मचाऱ्यांना ओलीस धरले. लॉकरची चावी घेऊन रोख २५ लाख रुपयांसह बँकेत तारण म्हणून ठेवलेले सोने असा एकूण एक कोटी २५ लाखांचा मुद्देमाल लुटला. त्यानंतर सर्व कर्मचाऱ्यांना स्ट्रॉंगरूममध्ये कोंडून तिघांनी पलायन केले.

गोंदी पोलिस ठाण्याचे निरीक्षक शीतलकुमार बल्लाळ, उपनिरीक्षक गजानन कौळासे व त्यांच्या सहकाऱ्यांनी घटनास्थळी भेट दिली. त्यानंतर पोलिस अधीक्षक विनायक देशमुख, अपर पोलिस अधीक्षक विक्रांत देशमुख, स्थानिक गुन्हे शाखेचे निरीक्षक सुभाष भुंजग यांच्या पथकाने पाहणी केली. ठसे तज्ज्ञांसह श्वानपथकाला पाचारण करून पंचनामा केला.

बॅंकांकडून सुरक्षा वाऱ्यावर

जिल्ह्यात काही वर्षांपासून एटीएमवर चोरट्यांनी डल्ले मारले होते. त्यामुळे बॅंकांच्या अधिकाऱ्यांना एटीएमसह बॅंकेत सुरक्षारक्षक नेमण्याची सूचना पोलिसांनी केली होती. मात्र, बॅंकांकडून याकडे दुर्लक्ष केले जात आहे. शहागडमधील क्रेडिट सोसायटीच्या शाखेत दरोडा पडला त्यावेळीही सुरक्षारक्षक नव्हता, असे सांगण्यात येते.

गावठी पिस्तुलांचा सुळसुळाट

जिल्ह्यात गावठी पिस्तुलांचा सुळसुळाट सुरूच आहे. गेल्या दहा महिन्यांत पोलिसांनी नऊ गावठी पिस्तुले जप्त केली आहेत. क्रेडिट सोसायटीच्या शाखेत दरोड्यातील संशयितांकडे दोन पिस्तुले असल्याचे सीसीटीव्हीमध्ये दिसून आले. गावठी पिस्तुलांचा सुळसुळाट पोलिसांसाठी डोकेदुखी बनला आहे.

सीसीटीव्हीत दरोडेखोर कैद

बुलडाणा अर्बन क्रेडिट सोसायटीच्या शाखेतील दरोड्याचा थरार तेथील सीसीटीव्ही कॅमेऱ्यात कैद झाला आहे. त्यानुसार शाखा कार्यालयात प्रवेश केल्यानंतर तिघांपैकी दोन दरोडेखोरांनी पिस्तूल काढले, एका पिस्तुलाला सायलेन्सरही होता, संशयित चाळिशीच्या आतील असल्याचे दिसत असल्याचे पोलिसांनी सांगितले.