सिंदखेड राजा (जि. बुलडाणा) : विदर्भातील पहिला सहकारी साखर कारखाना म्हणजे सिंदखेड राजा तालुक्यातील जिजामाता सहकारी साखर कारखाना १९७२ मध्ये उभारला होता. परंतु, तांत्रिक अडचणीमुळे अनेक वर्षांपासून कारखाना बंद अवस्थेत आहे. पालकमंत्री डॉ. राजेंद्र शिंगणे यांनी साखर कारखाना सुरू करण्यासाठी पुढाकार घेतला आहे. आरोग्यमंत्री राजेश टोपे व वर्क मॅनेजर यांनी कारखान्याची प्राथमिक पाहणी करून माहिती घेतली.

२० वर्षांत जिजामाता सहकारी साखर कारखाना दोन वर्षे सुरू होता. दोन वर्षांत दुष्काळी परिस्थिती असल्यामुळे कारखाना कमी प्रमाणात सुरू राहिला. साखर उद्योगांमध्ये अनेक अडचणी असतात. साखर उद्योगावर अवलंबून न राहता त्याचबरोबर इथेनॉल, वीजसह सहवीज प्रकल्प सुरू ठेवावे लागतात. तेव्हा साखर कारखाना सुरळीत चालू शकतो, असे राजेश टोपे यांनी सांगितले.

खडकपूर्णाचा प्रकल्प असल्यामुळे व परिसरात सिंचनाची चांगली व्यवस्था असल्यामुळे पालकमंत्री डॉ. राजेंद्र शिंगणे यांनी जिजामाता सहकारी साखर कारखाना सुरू होण्यासाठी अनेकवेळा चर्चा केली. त्यामुळे आम्ही जिजामाता सहकारी साखर कारखान्याची प्राथमिक पाहणी करण्यासाठी आलो. साखर कारखाना सुरू झाला तर परिसरामध्ये लक्ष्मी नांदू शकते. कारखाना सुरू करण्यासाठी मोठी गुंतवणूक करावी लागणार आहे. त्यासाठीच प्राथमिक पाहणी करण्यासाठी आम्ही आलो आहोत, असे राजेश टोपे यांनी सांगितले.

यावेळी राष्ट्रवादी काँग्रेसचे जिल्हाध्यक्ष अ‍ॅड. नाझेर काझी, टेक्निकल मॅनेजर सुरवसे, प्रदेश सरचिटणीस इरफान अली, माजी सभापती विलासराव देशमुख, सरपंच प्रकाश सांगळे, गजानन देशमुख, रामा राठोड यांच्यासह अनेक जण उपस्थित होते.

मोठ्या प्रमाणावर रोजगार मिळेल

जिजामाता सहकारी साखर कारखाना हा शेतकऱ्यांसाठी व परिसरातील नागरिकांसाठी वरदान आहे. कारखाना सुरू करण्यासाठी प्रयत्न सुरू आहे. महाविकासआघाडी स्थापन झाल्यापासून मतदारसंघातील बंद असलेले प्रकल्प सुरू होण्यासाठी पाठपुरावा करण्याचा प्रयत्न सुरू आहे. त्याचाच भाग म्हणून साखर कारखान्याची पाहणी करण्यासाठी आरोग्य मंत्री राजेश टोपे व सहकारी आले आहे. कारखाना भाडेतत्त्वावर किंवा विक्री घेऊन ताब्यात घेतल्यास परिसरातील ऊस उत्पादक व शेतकऱ्यांना मोठ्या प्रमाणावर रोजगार मिळेल, असे पालकमंत्री डॉ. राजेंद्र शिंगणे यांनी सांगितले.