वाशीम : वाशीम विधानसभा मतदार संघाचे (राखीव) कॉंग्रेसचे माजी आमदार सुरेश इंगळे यांचे गुरुवारी रात्री अल्पशा आजाराने निधन झाले. ११ ऑगस्ट रोजी रात्री अस्वस्थ वाटू लागल्याने त्यांना वाशीम येथील देवळे हॉस्पिटलमध्ये दाखल केले होते. परंतु, प्रकृतीत फारसी सुधारणा होत नसल्यामुळे डॉक्टरांनी त्यांना पुढील उपचारासाठी आयकॉन हॉस्पिटल अकोला येथे पाठविले. उपचारादरम्यान गुरुवारी रात्री त्यांची प्राणज्योत मालवली.

सन २००४ ते २००९ पर्यंत ते वाशीम मतदारसंघाचे कॉंग्रेसचे आमदार होते. त्यानंतर २००८ ते २०१४ पर्यंत ते महात्मा फुले मागासवर्गीय विकास महामंडळाचे अध्यक्ष होते. सध्या ते महाराष्ट्र प्रदेश कॉंग्रेस कमिटीचे सरचिटणीस म्हणून कार्यरत होते. राज्याचे तत्कालीन मुख्यमंत्री स्व. विलासराव देशमुख यांच्यासोबत माजी आ. सुरेश इंगळे यांचे अतिशय सलोख्याचे संबंध असल्याने त्यांनी त्यांच्या कार्यकाळात अनेक विकासकामे मतदारसंघात खेचून आणली होती.

त्यांनी पैनगंगा नदीवरील कोल्हापुरी बंधारे प्रकल्प मार्गी लावल्यामुळे आजमितीस तोंडगाव सर्कलमधील परिसरासोबतच हिंगोली जिल्ह्यातील परिसरसुध्दा सिंचनामुळे सुजलाम, सुफलाम झाला आहे. स्थानिक पद्मतिर्थ मोक्षधामावर शुक्रवारी दुपारी अंत्यसंस्कार करण्यात आले. यावेळी काँग्रेस कमिटीचे जिल्हाध्यक्ष ॲड. दिलीपराव सरनाईक, जिल्हा परिषद सदस्य अरविंद पाटील इंगोले, जिल्हा पत्रकार संघाचे अध्यक्ष माधवराव अंभोरे, माजी नगराध्यक्ष लक्ष्मणराव इंगोले, दीपकराव भांदुर्गे, हाऊसफिनचे माजी संचालक नामदेवराव मापारी मामा, जिल्हा परिषदेचे शिक्षण सभापती चक्रधरभाऊ गोटे, काँग्रेस सेवादलाचे अध्यक्ष डॉ. विशाल सोमटकर, प्राचार्य अरुणराव सरनाईक, कंत्राटदार बाळूभाऊ मुठाळ, कार्यकारी अभियंता किशोर माहुरे, कॅप्टन साईदास वानखेडे, प्रा. डॉ. सुभाष जाधव यांच्यासह राजकीय, सामाजिक, शैक्षणिक, सांस्कृतिक क्षेत्रातील मंडळी उपस्थित होती. त्यांच्या पश्चात पत्नी, भाऊ, दोन मुलं, दोन मुली, सुना, जावई, नातवंडे असा बराच मोठा परिवार आहे.