अकोला : जिल्हा परिषद व त्याअंतर्गत येत असलेल्या पंचायत समित्यांमध्ये कार्यरत वर्ग तीन व वर्ग चार कर्मचाऱ्यांच्या बदल्याचा बिगुल वाजला आहे. त्यानुसार बदल्यांची प्रक्रिया २५ व २६ मे रोजी जिल्हा परिषदेच्या राजश्री शाहू महाराज सभागृहात पार पडेल. ही प्रक्रिया समुपदेशनाने पार पडणार असून १० टक्के बदल्या प्रशासकीय तर १० टक्के बदल्या विनंतीवर करण्यात येतील.

राज्यामध्ये कोरोना विषाणूच्या संक्रमण काळात राज्य प्रशासनाने शासकीय कर्मचाऱ्यांच्या बदल्या कमी प्रमाणात करण्याचा निर्णय घेतला होता. त्यासोबतच बदल्यांची प्रक्रिया ३१ जुलै २०२१ पर्यंत पूर्ण करण्याचे निर्देश दिले होते. त्यानुसार जिल्हा परिषद व त्याअंतर्गत येत असलेल्या पंचायत समित्यांमधील बदल्यांची प्रक्रिया जिल्हा परिषदेच्या पार पडली होती.

२०२१ मध्ये झालेल्या बदली प्रक्रियेदरम्यान दहा टक्के प्रशासकीय तर पाच टक्के विनंतीवर बदल्या करण्यात आल्या होत्या. दरम्यान यावेळी मात्र २० टक्के बदल्या करण्यात येणार आहेत. त्यामध्ये १० टक्के प्रशासकीय तर १० टक्के बदल्या विनंतीवर करण्यात येतील. जिल्हा परिषदेच्या राजश्री शाहू महाराज सभागृहात ही प्रक्रिया पार पडेल.

बदल्यांपूर्वी कर्मचाऱ्यांचे समूपदेश करण्यात येईल. बदली प्रक्रियेदरम्यान जि.प. अध्यक्ष, उपाध्यक्ष, संबंधित विषय समितीचे सभापती, मुख्य कार्यकारी अधिकारी व संबंधित विभागाचे प्रमुख उपस्थित राहतील. यंदा मोठ्या प्रमाणात बदल्या होत असल्याने काही कर्मचाऱ्यांमध्ये आनंदाचे वातावरण आहे, तर काही कर्मचारी सोयीच्या ठिकाणी बदल्या मिळाव्या यासाठी प्रयत्नात आहेत.

अशा करणार बदल्या

कृषी, अर्थ, बांधकाम, ग्रामीण पाणी पुरवठा, लघुसिंचन व महिला आणि बाल कल्याण विभागाअंतर्गत कार्यरत कर्मचाऱ्यांच्या बदल्या २५ मे रोजी करण्यात येतील. सकाळी १० वाजतापासून ही प्रक्रिया सुरु होईल.

सामान्य प्रशासन, आरोग्य, पशुसंवर्धन, शिक्षण व ग्रामपंचायत विभागाअंतर्गत कार्यरत कर्मचाऱ्यांच्या बदल्या २६ मे रोजी करण्यात येतील. ही प्रक्रिया सकाळी १० वाजतापासून होईल व टप्प्या-टप्प्याने बदल्यांची प्रक्रिया पार पडेल.