अकोला : एकीकडे प्रभाग रचनेबाबत हरकती व सूचना मागविण्यात आल्या असून, दुसरीकडे जाहीर झालेल्या प्रभागानुसार मतदार यादीचे विभाजन करण्याची प्रक्रिया सुरू करण्यात आली आहे. निवडणूक आयोगाने मतदार यादी विभाजनासाठी २८ फेब्रुवारीपर्यंतची मुदत दिली आहे.

अकोला महानगरपालिकेच्या ९१ सदस्य असलेल्या ३० प्रभागांची रचना ता. १ फेब्रुवारी रोजी जाहीर करण्यात आली आहे. त्यानुसार ता. १४ फेब्रुवारीपर्यंत हरकती व सूचना मागविण्यात आल्या असून, ता. २६ फेब्रुवारीला आयोगातर्फे सुनावणी घेण्यात येणार आहे. एकीकडे ही प्रक्रिया सुरू असतानाच दुसरीकडे आयोगाच्या ता. ३ फेब्रुवारीच्या पत्रानुसार जाहीर प्रभागांच्या रचनेनुसार मतदार यादीच्या विभाजनाची प्रक्रिया सुरू करण्यात आली आहे. मतदार यादी विभागाजनासाठी मनपा प्रशासनाला २८ फेब्रुवारीची मुदत देण्यात आली आहे.

सीमांच्या बदलानुसार विभाजन

निवडणूक आयोगाने मनपा आयुक्तांना दिलेल्या पत्रानुसार निवडणूक प्रभागांच्या भौगौलिक सीमा अंतिमरित्या प्रसिद्ध झाल्यानंतर त्या अनुषंगाने होणारे बदल विचारात घेवून मतदार यादीचे विभाजन करण्यात येणार आहे. हरकती व आक्षेप नोंदविल्यानंतर त्यानुसार प्रभागांच्या सीमांमध्ये काही बदल झाल्यास अंतिम प्रभाग रचना प्रसिद्ध झाल्यानंतर त्यानुसार मतदार यादीच्या विभाजनातही बदल केले जाणार आहे.

विधानसभेच्या यादीवरून विभाजन

महानगरपालिकेच्या सार्वत्रिक निवडणुकीकरिता भारत निवडणूक आयोगाने ता. १ जानेवारी २०२२ रोजी अर्हता दिनांकावर ता. ५ जानेवारी २०२२ रोजी प्रसिद्ध केलेली विधानसभेची मतदार यादीच प्रभागाच्या सीमा लक्षात घेवून विभाजन करण्यात येणार आहे. ही मतदार यादी मूळ व पुरवणी स्वरुपात जिल्हाधिकारी यांच्याकडून मनपा प्राप्त होणार आहे.