Adani Group News: अदानी समूह नवीन वर्षात आणखी एक कंपनी ताब्यात घेणार आहे. अदानी रिन्यूएबल एनर्जीने (Adani Green Energy) यावर्षी ऊर्जा कंपनीतील 50 टक्के हिस्सा खरेदी करण्याचा निर्णय घेतला आहे.

कंपनीकडून मिळालेल्या माहितीनुसार, हा करार 15 कोटी रुपयांमध्ये पूर्ण होणार आहे. या कराराचा खुलासा करताना अदानी समूहाने सांगितले की, हा करार एस्सेल सोलर एनर्जी कंपनीसोबत केला जात आहे.

अदानी समूह आता राजस्थानच्या एस्सेल सोलर एनर्जी कंपनीतील 50 टक्के हिस्सा खरेदी करणार आहे. अदानी रिन्यूएबल एनर्जी होल्डिंग टू लिमिटेड हे अदानी ग्रीन एनर्जीचे एक विभाग आहे.

हेही वाचा : शेअर बाजारात सततचे लाॅसेस? मग यापैकी कुठली चूक होतेय? घ्या जाणून

50 टक्के शेअर्स राजस्थान सरकारकडे :

अदानी ग्रीन एनर्जीने शेअर बाजाराला सांगितले की, त्यांच्या उपकंपनीने 17 जानेवारी 2023 रोजी एस्सेल इन्फ्राप्रोजेक्ट्स लिमिटेडसोबत करार केला आहे. उर्वरित 50 टक्के समभाग राजस्थान सरकारकडे राहतील.

अदानी रिन्यूएबल एनर्जी होल्डिंग टू लिमिटेडचा राजस्थानमध्ये 750 मेगावॅट क्षमतेचा सोलर पार्क आहे. 2021-22 मध्ये त्याची उलाढाल 9.87 कोटी रुपये होती.

शेअर्समध्ये तेजी :

अदानी ग्रीन एनर्जीच्या शेअर्सबद्दल सांगायचे झाले तर, गेल्या 5 ट्रेडिंग दिवसांमध्ये कंपनीचे शेअर्स10.52 टक्क्यांनी वाढले आहेत. या कालावधीत शेअरचे मूल्य 198.50 रुपयांनी वाढून 2,085.50 च्या पातळीवर पोहोचले आहे.

या स्टॉकची 52 आठवड्यांची विक्रमी पातळी 3,050.00 रुपये आहे आणि खालची पातळी 1,650.20 रुपये आहे.

अलीकडे झालेल्या राजस्थान इन्व्हेस्टर समिटमध्ये गौतम अदानी सहभागी झाले होते. पुढील 5 ते 7 वर्षांत राजस्थानमध्ये सुमारे 65,000 कोटी रुपयांची गुंतवणूक करणार असल्याचे त्यांनी सांगितले होते.

यामध्ये कंपनी राजस्थानमध्ये सिमेंट उत्पादन क्षमता वाढवण्यासाठी गुंतवणूक करणार आहे. अदानी समूहाच्या या गुंतवणुकीमुळे राज्यात सुमारे 40,000 नोकऱ्या निर्माण होण्याची अपेक्षा आहे.