मुंबई : अतिवृष्टीमुळे देशभरात तूरडाळीच्या पिकांचे नुकसान झाले आहे. यामुळे तुरीच्या उत्पादनात घट होण्याचा अंदाज आहे. परिणामी तूरडाळीच्या किमतीत वाढ झाली आहे. कृषी मंत्रालयाच्या आकडेवारीनुसार गेल्या वर्षी ४७ लाख हेक्टरच्या तुलनेत यंदा ४२ लाख हेक्टर क्षेत्रावर तूर पेरणी झाली. परिणामी तूर पेरणीत ११ टक्क्यांनी घट झाली आहे. गेल्या दोन महिन्यांपासून तूरडाळीची किरकोळ किंमत १०० रुपये प्रतिकिलोच्या आसपास होती, परंतु सध्या डाळीचे भाव १११ रुपये प्रतिकिलोवर पोहोचले. वाढलेल्या डाळीच्या किमतींमुळे सर्वसामान्य नागरिकांचे बजेट कोलमडले आहे.

नागरिकांना दिलासा देण्यासाठी आता सरकारी पातळीवर प्रयत्न सुरी झाले आहेत. देशात तूरडाळीचे वाढलेले भाव पाहता केंद्र सरकारने सर्व राज्ये आणि केंद्रशासित प्रदेशांना तूरडाळीच्या साठ्यावर लक्ष ठेवण्याबरोबरच राज्यातील व्यापाऱ्यांनी जमा केलेल्या डाळीच्या साठ्याची माहिती केंद्र सरकारला देण्यास सांगितले आहे. यासोबत राज्यांना सध्याच्या तूर साठ्याचा डेटा ग्राहक व्यवहार विभागाच्या ऑनलार्इन मॉनिटरिंग पोर्टलवर अपडेट करावा लागेल. याशिवाय केंद्र सरकारने सर्व राज्य सरकारांना अत्यावश्यक वस्तू कायदा, १९५५ मधील तरतुदींची अंमलबजावणी करण्याचे आदेश दिले आहेत.

बफर स्टॉक बाजारात

येणाऱ्या सणासुदीच्या काळात डाळींच्या किमती वाढू नयेत यासाठी केंद्राने बफर स्टॉकमध्ये ठेवलेली ३८ लाख टन डाळ खुल्या बाजारात आणण्याचा निर्णय घेतला आहे. यामध्ये तीन लाख टन हरभऱ्याचाही समावेश आहे.