मुंबई : मद्यसम्राट विजय मल्ल्याच्या किंगफिशर एअरलाईन्सप्रमाणं आता स्पाईसजेट लिमिटेड ही विमान कंपनी देखील गोत्यात येणार अशी चिन्हं आहेत. त्याचं कारण म्हणजे या कंपनीची बँकांकडील कर्जे मोठ्या प्रमाणावर थकली असून या थकीत कर्जांना हायरिस्क कॅटेगिरीत समावेश केला आहे. त्यामुळं स्पाईसजेटसाठी ही धोक्याची घंटा ठरली आहे. (IDFC Indian Bank Yes Bank put SpiceJet loans in high risk category)

IDFC Bank, Yes Bank आणि Indian Bank या खासगी कर्ज देणाऱ्या बँकांनी स्पाईसजेट लिमिटेड या कंपनीच्या कर्जांना हायरिस्क कॅटेगिरीत टाकलं आहे. या बँकांना कंपनीच्या कॅशफ्लोबाबत काळजी वाटत आहे. याबाबत बँकांनी स्पाईसजेटकडं खात्री मागितली आहे. तसेच काही विमानं भाड्यानं देण्यातही कंपनी मागे असल्याची चर्चा आहे. दरम्यान, स्पाईसजेटचे शेअर्स ४.८ टक्क्यांनी कोसळल्याची देखील चर्चा आहे.

नक्की काय घडलंय?

या उन्हाळ्यात विमानांच्या सुरक्षेबाबत वारंवार निर्माण झालेले अडथळे आणि भाड्यानं विमान घेणाऱ्या कंपनीकडून चार विमानांची रद्द झालेली नोंदणी यामुळं नियामकांनी स्पाइसजेटचा मंजूर ताफा आठ आठवड्यांसाठी अर्धवट ठेवला होता. या दोन गोष्टींमुळं इंधनाच्या उच्च किंमती आणि अकासा एअर सारख्या नवीन विमान कंपन्यांकडून वाढती स्पर्धा यामुळं एअरलाईनची तरलता आणखी कमी होण्याची चिंता व्यक्त होत आहे. दरम्यान, कोरोनाच्या काळात स्पाईसजेटच्या कमाईला फटका बसल्यानंतर आत्तापर्यंत कंपनीकडून कोणतीही सकारात्मक बातमी नाही. कंपनीमध्ये उत्साह देखील दिसत नसल्याची चर्चा देखील सुरु आहे.

स्पाईसजेटचं स्पष्टीकरण

दरम्यान, स्पाइसजेटनं बँकांचा दावा खोडून काढताना आपलं कुठलंही बँक खातं हाय अलर्टवर नसल्याचं म्हटलं आहे. कंपनीच्या प्रवक्त्यानं रॉयटर्सला ईमेलद्वारे सांगितलं की, "कर्ज मान्य केलेल्या अटींनुसार दिली गेली आहेत. बँकेनं आमची कर्जे हायरिस्कवर ठेवल्याची आम्हाला माहिती नाही. स्पाइसजेटशी बँकांनी याबाबत कोणताही संवाद केलेला नाही.