मुंबई : आज ३१ जुलै आहे, या महिन्याचा शेवटचा दिवस. आज अनेक आर्थिक कामांसाठीची मुदत संपत आहे. त्यामुळे जर तुमची ही कामं राहिली असतील तर ही कामं लगेच पूर्ण करुन घ्या, अन्यथा तुमच्या समोर अनेक अडचणी येतील. याशिवाय तुम्हाला दंडही भरावा लागू शकतो.

यामधील महत्त्वाचं एक काम म्हणजे आयकर परतावा. आज ३१ जुलै रोजी आयकर परतावा दाखल करण्याची शेवटची तारीख आहे. (ITR Filing Deadline)

आज आयटी रिटर्न दाखल करण्याची शेवटची तारीख आहे. यानंतर आयकर परतावा दाखल केल्यास दंड भरावा लागणार आहे. आर्थिक वर्ष २०२१-२२ किंवा मूल्यांकन वर्ष २०२२-२३ साठी ITR दाखल करण्याची अंतिम तारीख ३१ जुलै आहे.

यावेळी सरकारने मुदतवाढ न देण्याचे संकेत दिले आहेत. जर तुम्ही अंतिम मुदतीपर्यंत ITR दाखल करू शकत नसाल, तर तुम्हाला ITR उशिरा दाखल करताना दंड भरावा लागेल. याशिवाय, तुम्हाला आयकर विभागाकडून प्राप्तिकर सूचना मिळू शकते. यानंतर, तुम्हाला कर भरावा लागेल, तसेच दंड भरावा लागेल.