अखेर गेल्या १२० दिवसांच्या प्रतीक्षेनंतर निफ्टीने पंधरा हजार ते सोळा हजारांचा टप्पा पार केलाय. आज निफ्टीने नवीन रेकॉर्ड प्रस्थापित करत इंट्राडेमध्ये १६ हजारांचा टप्पा पार केला. फेब्रुवारीच्या पाच तारखेला निफ्टीने १५ हजारांचा टप्पा पार केलेला. त्यानंतर तब्बल १२० ट्रेडिंग सत्रानंतर आता निफ्टीने १६ हजारांचा झेंडा फडकावला आहे.

एकीकडे आशियात कोरोना रुग्णांची संख्या वाढतेय, त्यामुळे संपूर्ण आशियाई बाजारपेठांमध्ये सुस्तीचं वातावरण पाहायला मिळत होतं. अशातही भारतीय बाजारपेठेने उत्तम कामगिरी बजावत निफ्टीमध्ये १६ हजारांचा टप्पा गाठलाय. आजच्या सत्रात अधिकांश सेक्टर्समध्ये चांगली खरेदी पाहायला मिळाली. यामध्ये फार्मा आणि IT तसेच FMCG सेक्टर्स आघाडीवर होते. जागतिक बाजारपेठांमधून येणारे संकेत जरी काहीसे कमकुवत असले तरीही निफ्टीने आज १६ हजारांचा टप्पा गाठला आणि त्यावर ट्रेडिंग होताना पाहायला मिळालं.

केवळ निफ्टीतच नव्हे तर आजच्या सत्रात सेन्सेक्समध्ये देखील चांगली तेजी पाहायला मिळाली. आज सेन्सेक्सने देखील नवीन रेकॉर्ड हाय नोंदवला आहे. सेन्सेक्सने ५३ हजार ५०० चा पल्ला गाठत नवीन इंट्राडे हाय नोंदवला आहे.

काय आहेत तेजीची कारणे :

जुलै २०२१ मध्ये GST कलेक्शनचे आकडे वाढून १.१६ लाख करोडवर गेले आहेत. यानंतर अर्थव्यवस्थेमधील रिकव्हरी अधिक वेगवान होऊ शकते असा अंदाज वर्तवला जातोय. एकीकडे भारतातील कोरोनाची दुसरी लाट कमी होत असताना इंडस्ट्रियल सेक्टरमध्ये देखील चांगली रिकव्हरी पाहायला मिळू शकते. कोअर सेक्टर्स बाबत जर बोलायचं झालं तर जून महिन्यात वार्षिक आधारावर तुलना केल्यास बिझनेस ८.९ टक्के वधारला आहे. याशिवाय भारताचा एक्स्पोर्ट आकडा देखील वार्षिक आधारावर सुधारलेला पाहायला मिळतोय. ज्याचा परिणाम सध्या भारतीय बाजारावर पाहायला मिळतोय असं तज्ज्ञ सांगतात.