माणुसकीला काळीमा? छे! कोण म्हणतो असा?

शरीर बघून तुम्ही त्यांना माणसं समजताय,

इथंच तर खरी चूक करताय...

माणसं अशी वागत नसतात, दिवसाढवळ्या बाई नासवत नसतात

कुणीतरी म्हणालं, जंगली जनावरं आहेत ही...

पण जनावरांची म्हणून एक अस्मिता असते, त्याचं काय?

जनावरं अशी वागली कधी? आहे का काही पुरावा?

उठसुठ कुणाचीही बदनामी करण्याचा 'माणसाचाच' इरादा

जंगलाचंच म्हणाल तर त्यांचाही एक कायदा असतो

उलट तिथं तर मादीचा सन्मान असतो

तिच्या मर्जीबिगर वाघ जवळही येत नाही

तिच्या रक्षणासाठी मग जीवाचीही पर्वा करीत नाही

वरवर बघितलं तर दिसायला माणसंच दिसतील

नीट बघितलं तर नक्कीच 'माणसं' नसतील

कुठूनतरी श्वापदं आलीत, लचके तोडण्या तयार झालीत

कमरेखालच्या मेंदूवर किती ही मस्तीत आलीत

माणसाने माणूस जाळला, माणसच्या टोळक्याने बाई भोगली

माणसाने घरं पेटवली, माणसाने जातीसाठी माती खाल्ली

अरे खुळ्यांनो, पेवातले किडेसुद्धा अनंदाने नांदतात..

द्वेषाचा किडा बाजूला सारुन. पण तुम्ही तर माणसं!

तुम्ही मरा असेच एकदाचे 'गड्याहो', असाही तुमचा उपयोग काय?

पुढची पिढी तुमच्यावर थुंकणारही नाही, नसेल त्यांच्याकडे माय

लेकरं अंधारात, बाया दहशतीत.. आता करणार तरी काय?

तुमच्या या पापाला असावी कठोर सजा.. पण इथले राज्यकर्ते घेतायत मजा