कामठी: दुसऱ्याच्या स्टॅंडवर दुचाकीला हलवीत असल्याचे पाहून जमावाने चोरीच्या संशयातून चाळीस वर्षीय व्यक्तीला मारहाण केली. तसेच त्याला जुने कामठी पोलिस ठाण्यात नेत असताना गेटसमोर पडून त्याचा मृत्यू झाला. मोहम्मद नासिर ऊर्फ गब्बर व. मोहम्मद रमजान अन्सारी रा. वारीसपुरा कामठी असे मृताचे नाव आहे.

येथील मोहम्मद नासिर ऊर्फ गब्बर व. मोहम्मद रमजान अन्सारी शनिवारी सायंकाळच्या सुमारास दुसऱ्याच्या स्टँडवर उभी असलेली दुचाकी पकडून हलविताना काहींना दिसून आला. यावरून चोरी करीत झाल्याचा संशय आल्याने जमावाने त्याला मारहाण केली.

त्याला पकडून पोलिस ठाण्यात नेण्यात आले. परंतु पोलिस ठाण्याच्या गेटसमोरच खाली पडला. लगेच पोलिसांनी शासकीय वाहनातून उपजिल्हा रुग्णालयात नेले. मात्र डॉक्टरांनी तपासून मृत्यू झाल्याचे सांगितले. हे कळताच खळबळ उडाली. पोलिसांनी आकस्मिक मृत्यूची नोंद करून मृतदेह शवविच्छेदन गृहात पाठवला.

मागील काही दिवसात चोरीचे प्रमाण वाढल्याने नागरिक सावध झाले आहेत. त्यानुसार शनिवारी सायंकाळी साडे पाचदरम्यान नासिर फुटाना ओली चौकात एका उभ्या दुचाकीजवळ उभा राहून दुचाकीची छेडछाड करीत दिसला.

चोर समजून जमावाने मारहाण केली. तसेच जुनी कामठी पोलिसाच्या स्वाधीन केले. मात्र स्वाधीन करताच अवघ्या काही वेळातच तरुणाचा मृत्यू झाला. या घटनेत नासिर निर्दोष असून घटनेला जबाबदार कोण? हा चर्चेचा विषय आहे.

सीसीटीव्ही कॅमेऱ्याच्या माध्यमातून शोध घेण्यात येत आहे. बातमी लिहिस्तोवर कुणावरही गुन्हा दाखल केला नव्हता. पोलिसांनी तुर्तास आकस्मिक मृत्यूची नोंद केली आहे. मृताच्या पाठीमागे आई-वडील, पत्नी, तीन मुले असा बराच मोठा आप्तपरिवार आहे.