Latest Akola News: चॉकलेट आणि बिस्कीटचं आमिष दाखवून ३ लहान मुलांची छेड होत असल्याचा धक्कादायक प्रकार पातूरात घडला. पालकांनी पोलिस स्टेशनमध्ये तक्रार दिली. मात्र त्यावर पोलिसांनी कुठलीही कारवाई न केल्याने अखेर पालकांनी आज शनिवारी जिल्हा पोलिस अधिक्षकांकडे धाव घेत तक्रार दिली.

दिवसेंदिवस जिल्हयात लैंगिक अत्याचाराचे प्रमाण वाढत आहे. त्यात प्रामुख्याने लहान मुले, मुलींचा समावेश आहे. या घटनांमुळे समाजमन हेलावून गेले आहे. दरम्यान शनिवारी दुपारी अशीच एक घटना उघड झाली.

पातूरात तीन अल्पवयीन मुलांना आत्माराम ससाने या व्यक्तीने चॉकलेटचं आमिष दाखवत सोबत नेण्याचा प्रयत्न मागील काही दिवसापासून करीत होता. मात्र, तिन्ही मुलं त्याच्यासोबत जाण्यास नकार देत होते.

अखेर त्याच्या त्रासाला कंटाळून मुलांनी शाळेत जाणं टाळलं. तेव्हा नातेवाईकांनी मुलांना विचारणा केली असता, मागील महिनाभरापासून हा व्यक्ती सतत त्रास देत असल्याचं सांगितलं. तेव्हा चॉकलेटच आमिष देत मुलांना कपडे काढायला लावायचा अशी धक्कादायक माहिती पालकांना मुलांनी दिली.

तेव्हा पालकांच्या पायाखालची जमिनच सरकली. या प्रकाराविरोधात पालकांनी पातूर पोलिसांत तक्रारही दिली. मात्र पोलिसांनी कुठलीही कारवाई याप्रकरणात केली नाही. त्यामुळे चिडलेल्या अवस्थेत पालकांनी थेट पोलिस अधीक्षक कार्यालय गाठले.