Latest Gondia News: बदलापूर, अकोला, चंद्रपूर येथील घटना ताज्या असताना तिरोडा तालुक्यातील एका गावात जिल्हा परिषद हायस्कूल व कनिष्ठ महाविद्यालयात कार्यरत शिक्षकाने शाळेतीलच १६ वर्षीय विद्यार्थिनीच्या घरी जाऊन तिचा विनयभंग केला.

या प्रकरणी पीडित विद्यार्थिनीच्या तक्रारीवरून तिरोडा पोलिसांनी ३० आॅगस्ट रोजी रात्री दहाच्या सुमारास गुन्हा दाखल करीत आरोपी शिक्षकाला अटक केली आहे. उमेश टीकाराम मेश्राम (वय ५०, रा. मेंढा, ता. तिरोडा) असे अटकेतील शिक्षकाचे नाव आहे.

यातील पीडित विद्यार्थिनी ही तिरोडा तालुक्यातील एका गावातील जिल्हा परिषद हायस्कूल व कनिष्ठ महाविद्यालयात इयत्ता अकरावीची विद्यार्थिनी आहे. आरोपी उमेश मेश्राम हा याच हायस्कूलमध्ये इयत्ता पाचवी ते सातवीपर्यंतच्या विद्यार्थ्यांना शिकवितो. २२ ऑगस्ट रोजी पीडित विद्यार्थिनी ही शाळेला सुट्टी झाल्यानंतर घरी आली.

उमेशने तिला जवळ बोलावून तिच्याशी अश्लील चाळे केले. तो एवढ्यावरच थांबला नाही, तर पीडित विद्यार्थिनी नकार देत असताना त्याने तिचे केस ओढून, पकडून आपल्या मोबाईलवरील अश्लील फोटो व चित्रफीत दाखवली. तिने आरोपीच्या तावडीतून आपली सुटका केली. यानंतर पीडितेचा भाऊ आल्यानंतर आरोपी त्याच्यासोबत बोलत बसला.

त्यानंतर त्याच दिवशी संध्याकाळी सातनंतर त्याने पीडितेच्या व्हाॅट्सअपवर अश्लील संदेश पाठविला. दरम्यान, तिने घडलेला प्रकार तिच्या मानस भावाला सांगितला. दुसऱ्या दिवशी त्याने शाळा गाठून आरोपी शिक्षक उमेशला जाब विचारला. तिने ३० ऑगस्ट रोजी घडलेला प्रकार कुटुंबीयांना सांगितला आणि त्याच दिवशी आरोपी उमेश मेश्राम विरोधात तक्रार दाखल केली.