Guru Purnima 2024: हिंदू धर्मामध्ये गुरुपौर्णिमेला विशेष महत्त्व आहे. या दिवशी गुरूंची मनोभावे पूजा केली जाते आणि त्यांचा सन्मान केला जातो. ही गुरुपौर्णिमा दरवर्षी आषाढ महिन्याच्या शुक्ल पक्षाच्या पौर्णिमेला साजरी केली जाते.

गुरूंच्या कृपेमुळे जीवनात सुख, शांती, आणि समृद्धी येते असे मानले जाते. गुरुपौर्णिमेच्या दिवशी योग्य विधीने पूजा करून गुरूंचा आशीर्वाद प्राप्त करून घेणे महत्त्वाचे आहे. यामुळे जीवनात यश आणि प्रगती होते.

यंदा गुरुपौर्णिमा कधी आहे?

यावर्षी गुरुपौर्णिमा २१ जुलै २०२४, रविवारी साजरी केली जाणार आहे. पौर्णिमेचा शुभारंभ शनिवारी (ता. २०) संध्याकाळी ५:५९ वाजता होईल आणि रविवारी (ता. २१) दुपारी ३:४६ वाजता समाप्त होईल. उदय तिथीनुसार, रविवारी गुरुपौर्णिमेचा पवित्र सण साजरा केला जाईल.

गुरुपौर्णिमेचा पूजा विधी

पहाटे लवकर उठून स्नान करावे.

स्वच्छ आणि नवीन कपडे परिधान करावेत.

देवाचे नामस्मरण करून दिवसाची सुरवात करावी.

सूर्यदेवतेला अर्घ्यदान करावे.

पूजेच्या ठिकाणी भगवान विष्णू आणि वेदव्यास यांच्या मूर्ती किंवा फोटोची स्थापना करावी.

मूर्ती किंवा फोटोवर फुले, धूप, दीप, अक्षता अर्पण करावीत.

तुपाचा दिवा लावून आरती करावी आणि गुरूकवचाचे पठण करावे.

देवाला फळे, मिठाई, खीर किंवा गोड पदार्थाचा नैवेद्य दाखवावा.

बुद्धिमत्ता किंवा ज्ञानासाठी उपयुक्त पुस्तकाची पूजा करू शकता.

गरिबांना अन्न, दक्षिणा, कपडे किंवा अभ्यासाशी संबंधित वस्तूंचे दान करणे शुभ मानले जाते.