महाबळेश्वर : किल्ले प्रतापगड (Pratapgad Fort) आज ३६४ मशालींच्या प्रकाशाने उजळून निघाला. महोत्सव पाहण्यासाठी व श्री भवानीमातेचे दर्शन घेण्यासाठी भाविकांनी किल्ले प्रतापगडावर गर्दी केली होती. तहसीलदार तेजस्विनी पाटील यांनी मशाल महोत्सवासाठी विशेष उपस्थिती होती.

हजारो शिवभक्तांनी प्रतापगडावर हजेरी लावून मशाल महोत्सवाचा आनंद लुटला. ढोलताशांचा गजर व फटाक्यांच्या आतषबाजीने अवघा गड व परिसरात उजळून निघाला. आज भवानीमातेची विधिवत पूजा व गोंधळ झाल्यानंतर रात्री नऊच्या दरम्यान ढोल, ताशांच्या गजरात ‘जय भवानी, जय शिवाजी, छत्रपती शिवाजी महाराज की जय’च्या जयघोषात मशाली प्रज्वलित करण्यात आल्या.

हा कार्यक्रम रात्री उशिरापर्यंत सुरू होता. या वेळी नगारे, तुतारी, सनई, तसेच प्रतापगडावरील स्वराज्य ढोल, ताशा, पथक व लेझीमच्या गजरात, तसेच भगवे झेंडे फडकावत मशाली पेटून दीपोत्सव साजरा झाला. या वेळी फटाक्यांची जोरदार आतषबाजी करण्यात आली.

गडावर सर्वत्र लावलेल्या मशाली व फटाक्यांच्या आतषबाजीने गडावरील हा नयनरम्य नजराणा उपस्थितांनी डोळ्यात साठवून ठेवला. किल्ल्याच्या चहूबाजूंनी विद्युतरोषणाई करण्यात आली होती. भवानीमाता मंदिर ते बुरुजापर्यंत लावलेल्या मशालींमुळे गड व परिसर उजळून निघाला होता.