पितृपक्षाची सुरुवात होत आहे. या काळामध्ये देशभरातून लोक पिंडदानासाठी उत्तर प्रदेशातल्या प्रयागराज इथं येतात. या भागाला संगम नगरी म्हणूनही ओळखलं जातं. पण काही लोक असेही आहेत, जे परदेशात आहेत किंवा प्रयागराजला येऊ शकत नाहीत, अशा लोकांसाठी यंदा विशेष सुविधा उपलब्ध करून देण्यात आली आहे.

आता पिंडदान ऑनलाईनही करता येणार आहे. प्रयागराज इथल्या पुरोहितांनी मिळून एक वेबसाईट सुरू केली आहे. या वेबसाईटच्या माध्यमातून त्यांना बुकिंग मिळायलाही सुरुवात झाली आहे. स्थानिक पुरोहितांच्या म्हणण्यानुसार, या वर्षी पिंडदान ऑनलाईन पद्धतीने करण्यात येणार आहे, तशी सुविधा आम्ही लोकांना देत आहे. धार्मिक कार्यांचंही आता डिजिटलायझेशन होत आहे.

कोरोना काळामध्येसुद्धा अशीच परिस्थिती उद्भवली होती. लोक पिंडदान करण्यासाठी प्रयागराज किंवा इतर कुठे बाहेर जाऊ शकत नव्हते. तेव्हा लोकांनी इथल्या पुरोहितांना सांगून घरी बसूनच पुरोहितांच्या साहाय्याने पिंडदान केलं होतं. आता पुन्हा एकदा पिंडदानासाठी डिजिटल पद्धत वापरली जात आहे.

प्रयागराजमध्ये यंदा पितृपक्षाच्या कालावधीत बाहेर असणाऱ्या किंवा प्रयागराजला येऊ न शकणाऱ्या लोकांनासाठी एक वेबसाईट तयार केली जात आहे. या वेबसाईटवर देशाच्या बाहेर राहणाऱ्या बऱ्याचशा लोकांनी ऑनलाईन बुकिंग केलं आहे. या वेबसाईटचं नाव आहे पिंडदान डॉट कॉम.

पिंडदानासाठी हॉलंड, मॉरीशस आणि कॅनडामधल्या भारतीय लोकांनी बुकिंग केले आहेत. प्रयागराज इथले पुरोहित प्रदीप कुमार पांडे यांनी सांगितलं की, आत्तापर्यंत ऑनलाईन माध्यमातून आठ जणांची बुकिंग झाली आहे. पिंडदानासाठीच्या या वेबसाईटवरुन अनेक अर्ज आले आहेत. पण अजून निश्चिती झालेली नाही. प्रदीप कुमार यांनी सांगितलं की पिंडदानाची ही प्रक्रिया ऑनलाईन, व्हिडीओ कॉलच्या माध्यमातून होईल. दक्षिणेचे पैसेसुद्धा ऑनलाईन स्वरुपात घेतले जातील.

आपल्या पितरांच्या आत्म्याच्या शांतीसाठी आणि मोक्षप्राप्तीसाठी पितृपक्षात पिंडदान केलं जातं. हे पिंडदान प्रयागराज, काशी आणि गया इथं कऱण्यासाठी विशेष महत्त्व आहे. दरवर्षी मोठ्या संख्येने लोक पिंडदानासाठी प्रयागराज इथं येतात.