Manipur Violence:मणिपूरमध्ये भारतीय लष्कराच्या जवानाचे अपहरण करून हत्या केल्याची घटना समोर आली आहे. इंफाळच्या खुनिंगथेक गावात लष्कराच्या जवानाचा मृतदेह सापडला आहे. सेर्टो थांगथांग कोम असे या हवालदाराचे नाव आहे. मृत सैनिक लष्कराच्या डिफेन्स सिक्युरिटी कॉर्प्स प्लाटूनमध्ये होता आणि सध्या कांगपोकपी जिल्ह्यातील लेमाखॉंग येथे तैनात होता.

तीन जणांनी केले अपहरण

मिळालेल्या माहितीनुसार, जवान सुट्टीवर इम्फाळ पश्चिम येथील तरुंग येथील आपल्या घरी आला होता. दरम्यान, शनिवारी सकाळी दहाच्या सुमारास अज्ञात सशस्त्र लोकांनी कोमचे घरातून अपहरण केले. मृत जवानाच्या 10 वर्षांच्या मुलाने सांगितले की, तीन लोक त्याच्या घरात घुसले होते. त्यावेळी तो आणि त्याचे वडील व्हरांड्यात काम करत होते. मुलाने सांगितले की, अज्ञात बंदूकधाऱ्यांनी त्याच्या वडिलांच्या डोक्यावर पिस्तूल ठेवले आणि त्यांना पांढऱ्या रंगाच्या वाहनात बसवून तेथून पळ काढला.

डोक्यात गोळी झाडून हत्या

रविवारी सकाळपर्यंत कोमची कोणतीही माहिती मिळत नव्हती. रविवारी सकाळी 9.30 च्या सुमारास इम्फाळ पूर्वेतील सोगोलमांग पोलिस स्टेशनच्या खुनिंगथेक गावात लष्करी जवानाचा मृतदेह सापडला. जवानाचा भाऊ आणि मेहुण्यांनी त्याचा मृतदेह ओळखला. अधिका-यांनी सांगितले की, जवानाच्या डोक्यात गोळी लागली होती. जवान कोम यांच्या पश्चात पत्नी, मुलगा व मुलगी असा परिवार आहे. पीडित कुटुंबाच्या मदतीसाठी लष्कराने एक पथक पाठवले आहे.