नवी दिल्ली : आम आदमी पक्षाच्या(आप) खासदार स्वाती मालिवाल यांना सोमवारी दिल्लीचे मुख्यमंत्री अरविंद केजरीवाल यांचे साहाय्यक विभव कुमार यांच्याकडून धक्काबुक्की झाल्याच्या कथित घटनाक्रमानंतर जोरदार खळबळ उडाली आहे. मुख्यमंत्री कार्यालय किंवा ‘आप’कडून याबाबत अद्यापपर्यंत कोणतीही प्रतिक्रिया देण्यात आलेली नाही. मात्र, भाजपने या निमित्ताने मुख्यमंत्री केजरीवाल यांना लक्ष्य केले.

या संपूर्ण प्रकरणात पोलिसांकडे यासंदर्भातील औपचारिक तक्रार दाखल झाली नव्हती. पोलिसांच्या सांगण्यानुसार स्वाती मालिवाल यांनी दोन वेळा पोलिस नियंत्रण कक्षाला दूरध्वनी केला होता. पहिला दूरध्वनी साडेनऊच्या सुमारास तर दुसरा दूरध्वनी दहाच्या सुमारास आला होता. त्यानंतर तातडीने पोलिसांचे फिरते पथक मुख्यमंत्र्यांच्या निवासस्थानीही पोहोचले होते.

दिल्लीच्या उत्तर विभागाचे पोलिस उपायुक्त मनोज मीणा यांच्या म्हणण्यानुसार खासदार स्वाती मालिवाल यांना धक्काबुक्की झाल्यानंतर हे दूरध्वनी आले होते. मुख्यमंत्री अरविंद केजरीवाल यांच्या कार्यालयाकडून किंवा आपकडूनही यावर भाष्य करण्यात आलेले नाही.

दिल्लीतील मद्यधोरण गैरव्यवहार प्रकरणात तुरुंगात असलेल्या मुख्यमंत्री केजरीवाल यांना लोकसभा निवडणुकीसाठी जामीन मिळाल्यानंतर ते बाहेर आले असून पक्षाच्या पदाधिकारी आणि नेत्यांसमवेत त्यांच्या बैठका सुरू आहेत.

या घटनेनंतर केंद्रातील सत्ताधारी भाजपने या मुद्द्यावरून ‘आप’ला लक्ष्य केले आहे. भाजप नेत्या आणि दिल्लीतील उमेदवार बांसुरी स्वराज यांनीही स्वाती मालिवाल यांच्यावरील हल्ला लाजिरवाणी घटना असल्याची टिपणी केली. तसेच हा प्रकार मुख्यमंत्री केजरीवाल यांच्या उपस्थितीत घडल्याचाही दावा केला.