नवी दिल्लीः अदानी ग्रुपने गुंतवणूकदारांचे पैसे परत करण्यासाठी २० हजार कोटींचा एफपीओ रद्द करण्याचा निर्णय घेतला आहे.

बुधवारी अदानी एंटरप्रायझेस लिमिटेडच्या बोर्डाने मोठा निर्णय घेतला आहे. बाजाराची अस्थिरता लक्षात घेता FPO रद्द करुन व्यवहार थांबवण्याचा निर्णय घेतला. त्यामुळे गुंतवणूकदारांचं नुकसान टळणार आहे.

अदानी एंटरप्रायझेसने स्टॉक एक्सचेंज फाईलिंगमध्ये म्हटले आहे की, गुंतवणूकदारांच्या हिताचा विचार करता कंपनीने एफपीओ अर्थात फॉलो ऑन पब्लिक ऑफर मागे घेण्याचा निर्णय घेतला आहे. कंपनीचा शेअर बुधवारी २८.५ टक्के घसरुन २,१२८.७० वर क्लोज झाला. अदानी एंटरप्रायझेसचे शेअर ५२ आठवड्यांच्या उच्चांकावरुन ४९ टक्क्यांनी कोसळले. फक्त एका आठवड्यात स्टॉक ३७ टक्क्यांनी खाली आला आहे.

शेअर बाजारातील चढ-उताराचा फटका अदानी समूहाला बसला आहे. गौतम अदानी यांनी सांगितलं की, शेअर बाजारातील अस्थिरता आणि चढउतार यामुळे गुंतवणूकदारांचं हित बघणं आवश्यक आहे. त्यामुळे आम्ही एफपीओमधून मिळवलेली रक्कम परत करणार आहोत. त्याच्याशी संबंधित देवाण-घेवाण थांबवण्याचा निर्णय घेत असल्याचं त्यांनी सांगितलं.

FPO म्हणजे काय?

फॉलो ऑन पब्लिक ऑफर म्हणजे कोणत्याही कंपनीसाठी पैसे गोळा करण्याचं एक माध्यम आहे. जी कंपनी शेअर मार्केटमध्ये अगोदर लिस्टेड आहे ती कंपनी गुंतवणूकदारांसाठी शेअर ऑफर करते. हे शेअर बाजारात उपलब्ध असलेल्या शेअरपेक्षा वेगळे असतात.