Taj Mahal Video : जगातील सात आश्चर्यांमध्ये समावेश असलेला ताजमहाल भारताचे लोकप्रिय पर्यटन स्थळ आहे. नुकतीच, या ताजमहालात एक विचित्र घटना घडली आहे. उत्तर प्रदेशमध्ये स्थित असलेल्या आग्रा येथील ताजमहालमध्ये २ तरूणांनी गंगाजल अर्पण केले आहे. हे दोन तरूण शनिवारी गंगाजल अर्पण करण्यासाठी ताजमहालमध्ये पोहोचले.

त्यानंतर, ताजमहालातील मुख्य मकबराजवळ स्थित असलेल्या दरवाज्यावर गंगाजल अर्पण केले. या तरूणांचा गंगाजल अर्पण करतानाचा व्हिडिओ देखील समोर आला आहे. दरम्यान, अखिल भारत हिंदू महासभेने, असा दावा केला आहे की, तेजोमहालय शिवमंदिरात गंगाजल अर्पण करण्यात आले आहे. महत्वाची बाब म्हणजे हे गंगाजल अर्पण करताना व्हिडिओ काढण्यात आला, त्यानंतर, तो मोठ्या प्रमाणात व्हायरल देखील करण्यात आला.

दरम्यान, या प्रकरणी पोलिस उपायुक्त सूरज राय यांनी सांगितले की, ते २ तरूण ताजमहालात भेट देण्यासाठी आले होते. ताजमहालात आल्यानतंर त्यांनी प्लॅस्टिक बॉटलमधून पाणी सांडवले होते. त्यांचे हे कृत्य पाहून त्या तरूणांना सीआयएसएफने (CISF) ताब्यात घेतले. या प्रकरणी आता ताजगंज पोलिस ठाण्यात तक्रार देण्यात आली असून, त्या तरूणांवर कायदेशीर कारवाई करण्यात येणार आहे.

अखिल भारत हिंदू महासभेचे प्रवक्ते संजय जाट या प्रकरणी म्हणाले की, 'महासभेचे २ बब्बर शेर विनेश चौधरी आणि श्याम यांनी तेजोमहालयात गंगाजल अर्पण केले आहे. हा आपला जन्मसिद्ध हक्क आहे. हा ताजमहल नसून हा तेजोमहालय आहे. जिथे भविष्यात आपण कावड वाहून भगवान शिवाला गंगाजलाने अभिषेक करत राहू', असे वादग्रस्त विधान त्यांनी केले आहे.