नवी दिल्ली : काँग्रेसचे दिवंगत नेते आणि सोनिया गांधी यांचे राजकीय सल्लागार अहमद पटेल यांचे चिरंजीव फैसल पटेल याने काँग्रेस सोडण्याचे संकेत दिले आहेत. याबाबत त्यांनी ट्वीट करून ''आपण वाट बघून थकलो आहे'', असे लिहिले आहे. तसेच हायकमांडकडून कोणतेही प्रोत्साहन नाही. त्यामुळे मी माझे पर्याय खुले ठेवत असल्याचे त्यांनी ट्वीमध्ये नमुद केले आहे. दरम्यान, फैसल पटेल आम आदमी पक्षात सामील होण्याची शक्यताही वर्तवली जात असून, गेल्या वर्षी एप्रिलमध्ये फैसलने दिल्लीचे मुख्यमंत्री अरविंद केजरीवाल यांची भेट घेतली होती.

फैसल पटेल यांचे वडील अहमद पटेल यांचे नोव्हेंबर 2020 मध्ये दीर्घ आजाराने निधन झाले. पटेल हे सोनिया गांधी यांच्या जवळच्या नेत्यांपैकी एक मानले जात होते. ते सोनिया गांधींचे राजकीय सल्लागारही होते. गेल्या काही दिवसांपासून फैसल काँग्रेसच्या हायकमांडच्या संपर्कात असल्याचे सांगितले जात होते. मात्र, फैसल यांना अपेक्षित प्रतिसाद मिळत नसल्याने ते पक्षावर नाराज झाले आहेत. ही नाराजी त्यांनी उघडपणे व्यक्त केल्याने आता राजकीय वर्तुळात चर्चांना उधाण आले आहे.

फैजल भरूच आणि नर्मदा जिल्ह्याच्या दौऱ्यावर

फैसल सध्या भरूच आणि नर्मदा जिल्ह्यातील 7 विधानसभा जागांच्या दौऱ्यावर आहे. माझी टीम सध्याच्या राजकीय परिस्थितीचे मुल्यांकन करेल आणि आमची मुख्य उद्दिष्टे पूर्ण करण्यासाठी आवश्यक असल्यास मोठे बदल करेल. असे फैसल यांनी काही दिवसांपूर्वी म्हटले होते. दरम्यान, राजकारणात येण्याविषयी आताच ठामपणे सांगू शकत नाही.