नवी दिल्ली - विश्व हिंदू परिषद आणि बजरंग दलाने शाहरुख खानच्या पठाण चित्रपटाला विरोध करणार नसल्याचे जाहीर केले आहे. सेन्सॉर बोर्डाच्या सूचनेनुसार चित्रपटातील गाण्याचे वादग्रस्त बोल आणि दृश्ये काढून टाकण्यात आले आहे. आता हे गाणे पाहायचे की नाही याचा निर्णय दोन्ही संघटनांनी प्रेक्षकांवर सोडला आहे. अभिनेता शाहरुख खानला हा मोठा दिलासा मानला जात आहे. (Pathaan Release news in Marathi)

या चित्रपटाच्या प्रदर्शनादरम्यान गुजरात सरकारने मल्टिप्लेक्सच्या सुरक्षेचे आश्वासन दिले आहे. विहिंपचे राज्य मंत्री अशोक भाई रावल यांनी एका निवेदनात म्हटले की, अभिनेता शाहरुख खान, अभिनेत्री दीपिका पदुकोण आणि जॉन अब्राहम यांच्या पठाण चित्रपटातील गाण्यातील काही दृश्ये आणि बोलांवर हिंदू समाजाचा आक्षेप होता. विहिंप आणि बजरंग दलाने त्याला विरोध केला होता. त्यामुळे सेन्सॉर बोर्डाच्या सूचनेनुसार चित्रपटातील गाण्याचे वादग्रस्त बोल आणि सीन काढून टाकण्यात आले आहेत.

अशोकभाई रावल म्हणाले की, चित्रपट निर्माते, थिएटर आणि मल्टिप्लेक्स मालक हे चित्रपटसृष्टीचे भागीदार आहेत, परंतु त्यांनी धर्म, संस्कृती आणि देशाचा आदर लक्षात घेऊन अशा चित्रपटांना विरोध केल्यास विहिंप आणि बजरंग दलाच्या कार्यकर्त्यांना रस्त्यावर उतरावे लागणार नाही. हा चित्रपट पाहायचा की नाही याचा निर्णय आता प्रेक्षकांनी घ्यायचा आहे, असे रावल यांनी सांगितले.

अलीकडेच गुजरात मल्टिप्लेक्स ओनर्स असोसिएशनने राज्य सरकारकडे मल्टिप्लेक्स आणि थिएटर्सचे संरक्षण करण्याची मागणी केली होती. राज्य सरकारच्या वतीने गृहमंत्री हर्ष संघवी यांनी असोसिएशन, मल्टिप्लेक्स आणि थिएटर मालकांना पूर्ण सुरक्षा देण्याचे आश्वासन दिले आहे. पोलिस महासंचालक आशिष भाटिया यांनी ही मल्टिप्लेक्स आणि नाट्यगृहांची सुरक्षा सुनिश्चित करण्याच्या सूचना जिल्हा आयुक्त आणि पोलिस अधीक्षकांना दिल्या आहेत.