ज्या दिवशी मोदी पंतप्रधान नसतील, त्या दिवशी देश भ्रष्टाचारमुक्त होईल, असं विधान दिल्लीचे मुख्यमंत्री अरविंद केजरीवाल यांनी केलं आहे. तसंच ईडी आणि सीबीआयने देशातल्या सगळ्या भ्रष्टाचाऱ्यांना एका पक्षात एकत्र करून टाकलं आहे, असंही ते म्हणाले. यावेळी त्यांनी नारायण राणेंचाही उल्लेख केला आहे.

ईडी सीबीआयच्या भीतीने सगळे नेते भाजपामध्ये आल्याचंही केजरीवाल म्हणाले. नारायण राणेंचा उल्लेख करताना ते म्हणाले, "ईडी सीबीआयने नारायण राणेंच्या डोक्यावर बंदूक ताणली आणि विचारलं, ते म्हणाले भाजपामध्ये यायचंय. सुवेंदू अधिकारी, मुकुल रॉय यांच्या डोक्यावरही अशीच बंदूक होती. कारण त्यांनी घोटाळे केले होते. देशातले सगळे चोर एकाच पक्षात भाजपामध्ये आहेत. "

यावेळी बोलताना त्यांनी पंतप्रधान नरेंद्र मोदी यांनाही टोला लगावला आहे. "मोदी आज पंतप्रधान आहेत, पण कधी ना कधी ते पायउतार होतीलच ना. ज्या दिवशी ते पायउतार होतील, त्या दिवशी देश भ्रष्टाचारमुक्त होतील. कारण चोर पकडण्यासाठी आता फारसे कष्ट पडणार नाहीत. ते सगळे एकाच खोलीत, एकाच पक्षात एकत्र आहेत", असं अरविंद केजरीवाल म्हणाले आहेत.