Arvind kejriwal : दिल्ली सरकार आणि नायब राज्यपाल यांच्यातील अधिकारांच्या लढाईवर सर्वोच्च न्यायालयाचे घटनापीठाने आज (11 मे) रोजी निकाल सुनावला. सुप्रीम कोर्टाने आप सरकारला मोठा दिलासा देत केंद्र सरकारला दणका दिला आहे.

दिल्लीतील सेवांचा आधिकार दिल्ली सरकारलाच असल्याचे सर्वोच्च न्यायालयाने म्हटले आहे. CJI डी वाय चंद्रचूड यांनी या निकालाचं वाचन केलं. दरम्यान या निकालानंतर केजरीवाल सरकार अ‍ॅक्शन मोडमध्ये आले आहेत. दिल्ली सरकारने सेवा सचिव आशिष मोरे यांना हटवले आहे. एबीपी हिंदीने याबाबत वृत्त दिले आहे.

सुप्रीम कोर्टाच्या निर्णयानंतर दिल्लीचे मुख्यमंत्री अरविंद केजरीवाल म्हणाले, आता इथे कामाला गती येईल कारण आधी त्यांचे हात बांधलेले होते. जनतेच्या कामात अडथळा आणणाऱ्या अधिकाऱ्यांना त्याचे परिणाम भोगावे लागतील.

दिल्ली सचिवालयात मंत्रिमंडळाच्या बैठकीनंतर झालेल्या पत्रकार परिषदेत मुख्यमंत्री केजरीवाल म्हणाले, "सार्वजनिक कामात अडथळा आणणाऱ्या अधिकाऱ्यांना येत्या काही दिवसांत त्याचे परिणाम भोगावे लागतील. माझे हात बांधून मला पाण्यात टाकले होते, पण अनेक अडचणी असतानाही आम्ही पोहत राहिलो, आम्ही दिल्लीसाठी चांगले काम केले."