काँग्रेसने शनिवारी आपल्या अधिकृत एक्स (ट्विटर) हँडलवरून पंतप्रधान मोदी आणि राहुल गांधी यांचा एक पॅरोडी व्हिडिओ पोस्ट केला होता. या व्हिडिओमधील देशाच्या नकाशातून चक्क भारताचा नॉर्थ-ईस्ट भाग गायब असल्याचं आसामचे मुख्यमंत्री हिमंता बिसवा सर्मा यांनी म्हटलं आहे. या व्हिडिओवरून राहुल गांधींवर टीका करण्यात येत आहे.

आसामचे मुख्यमंत्री हिमंता बिसवा सर्मा यांनी आपल्या एक्स हँडलवरुन या व्हिडिओचे काही स्क्रीनशॉट पोस्ट केले आहेत. यामधील भारताच्या नकाशाकडे लक्ष वेधून घेत त्यांनी काँग्रेसवर आरोप केले आहेत.

"संपूर्ण इशान्य भारत एखाद्या शेजारील राष्ट्राला विकण्यासाठी कदाचित काँग्रेसने गुप्तपणे करार केला आहे. यासाठीच तर राहुल गांधी परदेश दौऱ्यावर गेले नव्हते ना?" असं मुख्यमंत्र्यांनी आपल्या पोस्टमध्ये म्हटलं आहे.

काय आहे व्हिडिओ?

काँँग्रेसने आपल्या अधिकृत एक्स हँडलवरुन एक पॅरोडी व्हिडिओ पोस्ट केला आहे. यामध्ये पंतप्रधान मोदी आणि राहुल गांधी यांच्याशी साधर्म्य दाखवणारे दोन अ‍ॅनिमेटेड कॅरेक्टर दाखवण्यात आले आहेत. यात 1975 साली आलेल्या 'दीवार' चित्रपटातील सीन रीक्रिएट करण्यात आलेला आहे. व्हिडिओमधील मोदींना अमिताभ बच्चन यांच्या जागी ठेवण्यात आलं आहे, तर राहुल गांधी यांना शशी कपूर यांच्या जागी.

या व्हिडिओमध्ये पंतप्रधान मोदी म्हणतात, की 'माझ्याकडे ईडी आहे, पोलीस आहेत, पॉवर आहे, पैसा आहे, मित्र आहेत.. तुझ्याकडे काय आहे?' त्यावर राहुल गांधी रिप्लाय देतात की 'माझ्या सोबत संपूर्ण देश आहे.' दीवार चित्रपटातील 'मेरे पास माँ है' या सुप्रसिद्ध डायलॉगची ही कॉपी आहे.

या व्हिडिमध्ये हे दोघे बोलत असताना मागे भिंतीवर एक पोस्टर आहे. या पोस्टरमध्ये भारताचा नकाशा दाखवला आहे. मात्र, या नकाशात संपूर्ण नॉर्थ-इस्ट भारत दिसत नसल्याचा आरोप भाजपने केला आहे. त्यामुळे आता सोशल मीडियावर आणखी एक वॉर सुरू झालं आहे.