Bageshwar Dham Dhirendra Shashtri : बागेश्वर धामचे धीरेंद्र कृष्ण शास्त्री मागच्या काही दिवसांपासून टीव्ही आणि इंटरनेटवर चर्चेत आहेत. हे महाराज लोकांकडून कुठलीही माहिती न घेता त्यांच्या समस्या समजून घेतात आणि त्याचं समाधानही करतात, असा दावा केला जात आहे.

बागेश्वर धामचे पीठाधीश्वर धीरेंद्र कृष्ण शास्त्री यांनी देशासाठी काही केलं का? असा प्रश्न विचारण्यात आला. 'आज तक'ने त्यांची मुलाखत घेतली आहे. तुम्ही कोरोना महामारी येणार किंवा दहशतवादी हल्ल्याविषयी माहिती देऊन देशाची मदत केली का? असे प्रश्न विचारण्यात आले.

या प्रश्नांवर बाबा म्हणाले की, मी कोणी भविष्यकार नाही की ज्योतिषाचार्य नाही. परंतु जेव्हा कुणी दरबारामध्ये प्रश्न घेऊन येतात तेव्हा मी माझ्या आतली प्रेरणा आणि अनुभूतींवरुन समस्यांचं समाधान करतो. जेव्हा एखादा राजकीय नेता माझ्याकडे येतो आणि राज्याविषयी प्रश्न विचारतो तेव्हा मी योगायोग आणि संभाव्यता सांगतो. परंतु कुणी काही मागणं मांडणार नसेल तर प्रश्न सुटतील तरी कसे?, असं ते म्हणाले.

शास्त्री पुढे म्हणाले की, कुणी काही विचारणारच नसेल आणि मीच स्वतःहून संभाव्य समस्यांबद्दल सांगत गेलो तर कुणीही माझ्यावर विश्वास ठेवणार नाही. असंही विश्व कल्याणाची कामना आम्ही प्रत्येक दिवशी करत असतोच.

महाराष्ट्रातल्या नागपूरमध्ये बागेश्वर धाम सरकार नावाने प्रसिद्ध असलेल्या धीमेंद्र कृष्ण शास्त्री यांनी 'श्रीराम चरित्र-चर्चा' याचं पठन केलं होतं. त्यामुळे अंधश्रद्धा निर्मूलन समितीच्या वतीने शास्त्रींवर जादू-टोना आणि अंधश्रद्धा पसरवण्याचा आरोप केला आहे. समितीचे अध्यक्ष श्याम मानव यांनी यासंदर्भात आक्षेप घेतले आहेत.

दरम्यान, 'आज तक'च्या मुलाखतीमध्ये धीमेंद्र शास्त्री यांना पठाण सिनेमाबद्दल प्रश्न विचारण्यात आला. पठाण चित्रपटावर बहिष्कार टाकण्यासाठी दरबारामध्ये कुणी मागणं मागितलं होतं का? यावर शास्त्री म्हणाले की, असं मागणं कुणीही केलेलं नाही. पठाण चित्रपटात भगव्या रंगाला 'बेशर्म रंग' म्हटलं गेल्याने निषेध नोंदवला असल्याचं त्यांनी सांगितलं.