बेळगाव : मंदिरांच्या (Temple) आवारात सध्या मोबाईलचा (Mobile) अतिरेक झाला आहे. मोबाईलमधून सेल्फी काढणे, फोटो काढणे, मोठ्या आवाजात संभाषण करणे, व्हिडिओ काढणे आदी कारणांमुळे पुजारी तसेच मंदिरात येणाऱ्या अन्य भाविकांना त्रास होत आहे.

देवदर्शन करताना त्यांची एकाग्रता भंग होत आहे. या सर्वांची दखल धर्मादाय खात्याने घेतली आहे. त्यानुसार यापुढे धर्मादाय खात्याच्या अखत्यारितील सर्व मंदिरांमध्ये मोबाईल वापरावर निर्बंध घालण्यात आले आहेत.

बेळगावातील दक्षिण काशी श्री कपिलेश्वर मंदिर (Kapileshwar Temple), टिळकवाडी येथील श्री साई मंदिर, अनगोळ येथील श्री हरी मंदिर, समादेवी गल्ली येथील श्री समादेवी मंदिरात प्रवेश करण्यापूर्वी भाविकांना आपले मोबाईल 'स्वीच ऑफ' करणे अनिवार्य ठरणार आहे. धर्मादाय खात्यातर्फे सोमवारी (ता. १७) यासंबंधी अधिकृत आदेश जाहीर केला आहे.

या आदेशानुसार बेळगावसह तालुक्यातील पंत बाळेकुंद्री येथील श्री पंत महाराज मंदिर, सौंदत्ती येथील श्री यल्लम्मा मंदिर, रायबाग तालुक्यातील चिंचली मायाक्का मंदिर, हुक्केरी तालुक्यातील बडकुंद्री येथील होळेम्मा देवी मंदिरांचा समावेश आहे. या मंदिरात जाणाऱ्या भाविकांना यापुढे आपला मोबाईल बंद ठेवावा लागणार आहे.

मोबाईल वापरावर निर्बंध घातल्याबाबत मंदिर प्रशासनांनी भाविकांना पूर्वसूचना देणे आवश्यक आहे. यासाठी मंदिरामध्ये यापुढे ठराविक सूचना फलक लावण्यात यावेत, अशी सूचना करण्यात आली आहे. मंदिरामध्ये येणाऱ्या भाविकांना शांततापूर्वक देवदर्शन करण्याची सूचना करावी, अशा सूचना धर्मादाय खात्याकडून मंदिर प्रशासनाला करण्यात आली आहे.

धर्मादाय खात्याचा निर्णय स्वागतार्ह आहे. श्री कपिलेश्वर देवस्थानात ट्रस्टतर्फे या आधीच मंदिर परिसरात मोबाईल वापरावर निर्बंधाबाबत सूचना फलक लावण्यात आलेला आहे. यापुढे मुख्य प्रवेशद्वारावर मोबाईल निर्बंधाबाबत फलक उभारण्यात येणार आहे.

- अभिजित चव्हाण, सहसचिव, श्री कपिलेश्वर देवस्थान ट्रस्ट, बेळगाव