लखनऊ: सरकारी बँकेत काम करणाऱ्या एका महिला कर्मचाऱ्याने शनिवारी आत्महत्या (suicide) करुन जीवन संपवलं. श्रद्धा गुप्ता (Shraddha Gupta) असं मृत महिलेचं नाव आहे. राहत्या घराच्या छताला गळफास घेऊन श्रद्धाने जीवन संपवलं. उत्तर प्रदेशात अयोध्येमध्ये (Ayodhya) ही घटना घडली आहे. सध्यातरी ही आत्महत्या वाटत असली, तरी पोलीस हत्येच्या अंगानेही तपास करत आहेत. शवविच्छेदन अहवाल मिळाल्यानंतरच मृत्यूचे नेमके कारण स्पष्ट होईल.

श्रद्धाच्या रुममध्ये एक चिठ्ठी सापडली आहे. आत्महत्या करण्यापूर्वी लिहिलेल्या या चिठ्ठीत श्रद्धाने एका आयपीएस अधिकाऱ्याचे नाव नमूद केले आहे. या पत्रात अयोध्येत एसएसपी असणारे आशिष तिवारी, विवेक गुप्ता आणि अनिल रावत या तिघांची नाव आहेत. इंडिया टुडेने हे वृत्त दिले आहे.

श्रद्धा गुप्ता यांनी २०१५ मध्ये बँकेत क्लार्क म्हणून नोकरी सुरु केली होती. त्यानंतर खात्यातंर्गत परीक्षा उत्तीर्ण होऊन प्रमोशन मिळवले. २०१८ साली फैझाबादमध्ये त्यांची पोस्टिंग होती. अयोध्या पोलिसांनी विवेक गुप्ताला चौकशीसाठी ताब्यात घेतले आहे. चिठ्ठीत नाव असलेल्या तिघांविरोधात अयोध्या पोलिसांनी आत्महत्येला प्रवृत्त करणारे कलम ३०६ अंतर्गत गुन्हा दाखल केला आहे.

अनिलचे दुसऱ्या मुलींसोबत प्रेमसंबंध होते. त्या बद्दल श्रद्धाला समजलं होतं. त्यामुळेच माझ्या मुलीने त्याच्यासोबत लग्न करायला नकार दिला, असे श्रद्धाची आई सुनीताने सांगितलं. अनिल, आशिष विवेकचे मित्र होते, असा कुटुंबीयांचा दावा आहे. काल सकाळी दुधवाल्याने दरवाजा ठोठावला. पण आतून काही प्रतिसाद आला नाही. त्याने घराचे मालक गुप्ता यांना याची माहिती दिली. त्यांनी खिडकीतून आता डोकावून बघितले, त्यावेळी श्रद्धा गळफास घेतलेल्या स्थितीमध्ये होत्या.