बेळगाव : हमी योजनांच्या अंमलबजावणीवरून कर्नाटकात काँग्रेस (Congress) आणि भाजपमध्ये सुरू असलेल्या संघर्षाला नवं वळण मिळालंय. कारण, सार्वजनिक बांधकाम विभागाचे मंत्री सतीश जारकीहोळी यांनी केंद्र सरकारवर गृह ज्योती नोंदणी पोर्टल हॅक केल्याचा आरोप केलाय.

केंद्र सरकारनं आमचं सर्व्हर व सिस्टम इव्हीएमसारखं हॅक केलंय. त्यामुळं गॅरन्टी योजनांचा लाभ घेण्यासाठी नागरिकांना अर्ज करण्यास अडचणी येत आहेत, हे माझं विधान केवळ राजकीय आहे.

यातून कोणाला वैयक्तिक दोष देण्याचा उद्देश नव्हता, असं पालकमंत्री तथा सार्वजनिक बांधकाममंत्री सतीश जारकीहोळी (Satish Jarkiholi) यांनी म्हटलंय. माझ्या विधानाचा भाजप नेते वेगळाच अर्थ काढत असून हे योग्य नाही.

भाजप नेत्यांनीही अनेकदा भलतीच विधाने करून गोंधळ माजविण्याचा प्रयत्न केला आहे. अशा विधानांची मोठी यादीच तयार होऊ शकते, असंही जारकीहोळी म्हणाले. काँग्रेसनं योग्य नियोजन न करता हमी योजना जाहीर केल्याच्या केंद्रीय कोळसा मंत्री प्रल्हाद जोशी यांच्या आरोपाला जारकीहोळींनी प्रत्युत्तर दिलंय.

जारकीहोळी म्हणाले, आम्ही नियोजन केलं होतं. परंतु, आमचं मशीन केंद्रानं हॅक केलं. जसे ते ईव्हीएम हॅक करतात, तसेच त्यांनी हे हॅक केलं आहे. त्यामुळे विलंब झाला आहे. आम्ही काय करू शकतो?, असाही त्यांनी सवाल केला आहे.