गुजरात सरकारने (Gujrat Government) नुकताच एक मोठा निर्णय घेतला आहे. त्यानुसार इयत्ता ६ वी ते १२ वीच्या शालेय अभ्यासक्रमात श्रीमद भगवद्गीतेचा समावेश (Bhagavad Gita in School Syllabus) करण्याचा निर्णय गुजरात राज्य सरकारने घेतला आहे. त्यावरून आता देशात नव्या वादाला तोंड फुटलं आहे. अनेकांनी या निर्णयाचं स्वागत केलं असलं तरी, दुसऱ्या बाजूने या निर्णयावर टीका होतेय. आप नेते आणि दिल्लीचे उपमुख्यमंत्री मनिष सिसोदिया (Manish Sisodia) यांनी देखील यावरून गुजरात सरकारवर टीका केली आहे.

गुजरात सरकारने नुकताच हा मोठा निर्णय घेतला आहे. या संदर्भात राज्य सरकारने जारी केलेल्या परिपत्रकात म्हटलं आहे की, आपल्या परंपरा अभ्यासक्रमाशी जोडणे, तसेच त्याबद्दल अभिमानाची भावना जागृत करणे हा या निर्णयामागील उद्देश असल्याचं सरकारकडून सांगण्यात आलं आहे. आगामी शैक्षणिक वर्ष २०२२-२३ पासून गुजरातमधील शाळांमध्ये हा बदल लागू केला जाण्याची शक्यता आहे.

मनिष सिसोदिया यांनी या निर्णयाचं स्वागत करताना भाजपवर मात्र टीका केली आहे. सिसोदिया म्हणाले, "नक्कीच हे एक उत्तम पाऊल आहे. मात्र जे लोक या निर्णयाची घोषणा करत आहेत, त्यांनी आधी गीतेच्या मूल्यांचं पालन केलं पाहिजे. त्यांची कृत्यं रावणासारखी आहेत आणि ते गीते बद्दल बोलतात असं म्हणत सिसोदिया यांनी कानपिचक्या दिल्या.