Bihar Assembly Special Session : बिहारमध्ये नितीश कुमार सरकारनं (Nitish Kumar Government) विश्वासदर्शक ठराव जिंकला आहे. यापूर्वी राष्ट्रीय लोकशाही आघाडी (NDA) सरकारच्या काळात स्पीकर (सभापती) असलेले विजय कुमार सिन्हा (Vijay Kumar Sinha) यांनी त्यांच्याविरोधात आणलेल्या अविश्वास प्रस्तावावर मतदान करण्यापूर्वी राजीनामा दिला होता. आता विधानसभा अध्यक्ष निवडण्याची वेळी आलीय.

राष्ट्रीय जनता दलाचे (आरजेडी) अवध बिहारी चौधरी (Awadh Bihari Chaudhary) यांनी आज सभापतीपदासाठी अर्ज दाखल केला. अर्ज दाखल करण्यासाठी मुख्यमंत्री नितीश कुमार (Nitish Kumar) आणि उपमुख्यमंत्री तेजस्वी यादव (Tejashwi Yadav) उपस्थित होते. अवध बिहारी चौधरी हे सिवानमधून राजदचे आमदार आहेत. ते आरजेडी सुप्रीमो लालू प्रसाद यादव यांच्या जवळचे मानले जातात. उपमुख्यमंत्री तेजस्वी यादव यांच्याशीही त्यांचे चांगले संबंध आहेत.

महागठबंधन सरकारच्या विश्वासदर्शक ठरावासाठी बोलावण्यात आलेलं विधिमंडळ पक्षाचं विशेष अधिवेशन एक दिवसासाठी वाढविण्यात आलंय. आता हे कामकाज 26 ऑगस्टपर्यंत चालणार असून त्याच दिवशी गरज भासल्यास नवीन सभापतीपदासाठी मतदान होणार आहे. विजय कुमार सिन्हा यांच्या राजीनाम्यानंतर विधानसभेचं अध्यक्षपद रिक्त आहे. आरजेडीनं या पदासाठी आपले ज्येष्ठ नेते अवध बिहारी चौधरी यांचं नाव पुढं केलं आहे. त्यांनी आज या पदासाठी अर्ज दाखल केला. नामांकनाच्या वेळी मुख्यमंत्री नितीश कुमार आणि उपमुख्यमंत्री तेजस्वी यादव यांच्यासह महागठबंधनचे अनेक प्रमुख नेते उपस्थित होते. दरम्यान, विजय कुमार सिन्हा यांच्या राजीनाम्यानंतर सध्या उपसभापती महेश्वर हजारी हे कार्यकारी अध्यक्ष आहेत.