नवी दिल्ली : मॉब लिंचिंग (Mob Lynching) अर्थात जमावाकडून मारहाणप्रकरणी काँग्रेस नेते राहुल गांधी (राहुल गांधी) यांनी केलेल्या ट्विटनंतर भाजपच्या आयटी सेलचे प्रमुख अमित मालवीय (amti malviy) यांनी त्यांना उत्तर दिलं आहे. राहुल गांधींचे वडील आणि माजी पंतप्रधान राजीव गांधी (Rajiv Gandhi) यांच्यावर निशाणा साधताना "राजीव गांधी हे मॉब लिचिंगचे पितामह आहेत," असा आरोप त्यांनी केला आहे. (BJP Amit Malviya calls Rajiv Gandhi father of mob lynching after Rahul Gandhi tweet)

दिवसाच्या सुरुवातीला राहुल गांधी यांनी ट्विट करुन म्हटलं होतं, "सन २०१४ पूर्वी 'लिचिंग' हा शब्द कधी ऐकायलाही मिळत नव्हता" या ट्विटला यापुढे त्यांनी थँक्यू मोदीजी असा हॅशटॅगही वापरला होता. या ट्विटला उत्तर देताना मालवीय यांनीही एक ट्विट केलं. यामध्ये त्यांनी सन २०१४ पूर्वी देशातील विविध भागांमध्ये झालेल्या हिंसाचाराची वर्षनिहाय माहिती दिली.

मालवीय यांनी ट्विटमध्ये म्हटलं, "अहमदाबाद (१९६९), जळगाव (१०७०), मोरादाबाद (१९८०), नेली (१९८३), भिवंडी (१९८४), दिल्ली (१९८४), अहमदाबाद (१९८५), भागलपूर (१९८९), हैदराबाद (१९९०), कानपूर (१९९२), मुंबई (१९९३)....ही छोटीच यादी आहे. नेहरु-गांधी परिवाराच्या निरिक्षणाखाली यामध्ये १०० लोकांचा जीव गेला आहे"

यानंतर मालवीय यांनी एक व्हिडिओ देखील शेअर केला, ज्यामध्ये हिंसाचारानतंर एका रॅलीला संबोधित करताना राजीव गांधी दिसत आहेत. माजी पंतप्रधान इंदिरा गांधी यांच्या हत्येनंतर हा हिंसाचार उसळला होता. या व्हिडिओला कॅप्शन देताना त्यांनी म्हटलं की, "हे पाहा राजीव गांधींना जे मॉब लिचिंगचे पितामह आहेत" काँग्रेसनं रस्ते अडवले होते तसेच 'खून का बदला खून से लेंगे' अशी घोषणाबाजीही केली होती. महिलांवर बलात्कार, शीख पुरुषांच्या गळ्यात जळते टायर अडकवले होते, असा आरोपही त्यांनी या ट्विटमधून केला.