नवी दिल्ली- अभिनेत्री आणि आता राजकारणाच्या रिंगणात उतरलेली कंगना रनौत हिचा एक व्हिडिओ सोशल मीडियावर व्हायरल होत आहे. व्हिडिओमध्ये ऐकायला मिळतंय की, कंगना चुकून आपल्याच नेत्यावर टीका करत आहे. कंगना एका सभेत बोलत होती. यावेळी तिने काँग्रेस नेते राहुल गांधी यांच्यावर टीका केली. त्यानंतर राजदचे नेते तेजस्वी यादव यांचे नाव घेण्याऐवजी तिने भाजप नेते तेजस्वी सूर्या यांचे नाव घेऊन टीका केली.

मंडी लोकसभा मतदारसंघातून भाजपने कंगना रनौत हिला मैदानात उतरवलं आहे. शनिवारी ती एका सभेला संबोधित करत होती. यावेळी ती म्हणाली की, 'तेजस्वी सूर्या नवरात्री दिवशी मच्छी खात आहे. ' विशेष म्हणजे तेजस्वी यादव यांनी यावर प्रतिक्रिया दिली आहे. ते म्हणालेत की, 'ही कोण महिला आहे?' त्यांनी सोशल मीडियावर पोस्ट केली आहे.

कंगनाने मंडीतील एका सभेत विरोधातील काही नेत्यांना लक्ष्य केलं. त्यामध्ये दक्षिण बंगळुरुचे भाजपचे उमेदवार तेजस्वी सूर्या यांचे नाव तिच्याकडून चुकून घेण्यात आले. बिहारचे माजी उपमुख्यमंत्री तेजस्वी यादव यांनी नवरात्रीच्या दिवशी मच्छी खाल्याचा आरोप आहे. यासंदर्भात ९ एप्रिल रोजी तेजस्वी यादव यांनी एक व्हिडिओ शेअर केला होता. या व्हिडिओवरुन भाजपने तेजस्वी यादव यांच्यावर टीका केली होती. याच मुद्द्यावरुन कंगना तेजस्वी यादव यांच्यावर टीका करु पाहात होती.

कंगनाने यावेळी राहुल गांधी आणि अखिलेश यादव यांच्यावर जोरदार टीका केली. देशात काही राजकूमार आहेत. राहुल गांधी यांना चंद्रावर बटाटे उगवायचे आहेत. अखिलेश यादव हे देखील काही बरगळत असतात असं ती म्हणाली. ज्यांना आपल्या देशाची भाषा समजत नाही, आपली संस्कृती समजत नाही ते देश कसे चालवणार, असंही ती म्हणाली आहेत. मंडी लोकसभा मतदारसंघात १ जून रोजी मतदान होणार आहे.