केंद्रीय मंत्री सर्बानंदा सोनोवाल यांच्यासाठी पक्षाने पुन्हा केंद्रात जागा केली आहे. भाजपने राज्यसभेवरील रिक्त होणाऱ्या जागांसाठी दोन नावांची यादी जाहीर केली. यामध्ये आसाम राज्यातून सोनोवाल यांना पोटनिवडणुकीसाठी दावेदारी देण्यात आली आहे. तर मध्य प्रदेशातून अल. मुरुगन यांना राज्यसभेवर पाठवण्याची घोषणा भाजपाच्या मुख्य कार्यालयाने केली आहे.

यासंबंधी अधिकृत पत्र प्रसिद्ध करण्यात आले असून त्यामध्ये आसाम आणि मध्य प्रदेशातून रिक्त होणाऱ्या जागांवरून या दोघांच्या नावांची घोषणा करण्यात आली आहे. भाजपचे राष्ट्रीय महासचिव आणि मुख्यालय प्रभारी असणाऱ्या अरुण सिंह यांच्या सहीने हे पत्र प्रसिद्ध करण्यात आले आहे.

सोनोवाल हे सध्या केंद्रात मंत्री म्हणून कार्यरत आहेत. बंदरविकास, जहाजबांधणी आणि आयुष मंत्रालयाचा कार्यभार त्यांच्याकडे आहे. सोनोवाल यांनी आसामच्या मुख्यमंत्रीपदाची धुरा सांभाळली असून राज्याचे भाजपा प्रदेशाध्यक्ष देखील होते. तर, डॉ. अल. मुरुगन हे भाजपचे तामिळनाडू प्रदेशाध्यक्ष आहेत. मे महिन्यात पार पडलेल्या तामिळनाडू निवडणुकीत भाजपने एआयएडीएमके पक्षासोबत युती केली होती.