नवी दिल्ली- भाजपने जम्मू आणि काश्मीरसाठी जाहीर केलेली पहिली यादी स्थगित केली आहे. काही वेळापूर्वी 44 उमेदवारांची यादी भाजपने जाहीर केली होती .काही उमेदवारांच्या नावात अडचणी असल्याने यादी स्थगित केल्याची माहिती मिळत आहे. लवकरच नवी यादी जाहीर केली जाणार असल्याची माहिती आहे.

जम्मू आणि काश्मीर केंद्रशासित प्रदेशामध्ये ९० जागांसाठी निवडणुका तीन टप्प्यामध्ये होणार आहेत. यासाठी भाजपने आज सकाळी बैठकीनंतर ४४ उमेदवारांची यादी जाहीर केली होती. पण, अचानक भाजपने ही यादी मागे घेण्याचा निर्णय घेतला आहे. यादीमध्ये काही नावाबाबत अडचणी असल्याचं भाजपने म्हटलं आहे. नवी यादी लवकरच जाहीर केली जाण्याची शक्यता आहे.

जम्मू आणि काश्मीरमध्ये तीन टप्प्यांमध्ये निवडणुका होणार आहेत. १८ सप्टेंबर, २५ सप्टेंबर आणि १ ऑक्टोंबर रोजी हे मतदान पार पडेल. निकाल तीन दिवसानंतर ४ ऑक्टोंबर रोजी लागेल. निवडणूक आयोगाने दिलेल्या माहितीनुसार, पहिल्या टप्प्यामध्ये २४ जागांसाठी, दुसऱ्या टप्प्यासाठी २६ जागांवर आणि तिसऱ्या टप्प्यांत ४० जागांवर मतदान पार पडणार आहे.