महाराष्ट्रातील सत्तानाट्यानंतर आता यूपीतून एक मोठी बातमी समोर येत आहे. उपाध्यक्षपदाच्या निवडणुकीसाठी बसपने पत्ते उघडण्यास सुरुवात केली आहे. बहुजन समाज पक्षाच्या प्रमुख मायावती यांनी उपराष्ट्रपतीपदाच्या निवडणुकीत भाजप एनडीएचे उमेदवार जगदीप धनखर यांना पाठिंबा देणार असल्याची घोषणा केली आहे. मायावतींनी स्वत: ट्वीट करुन ही माहिती दिली आहे. दरम्यान, मायावतींच्या बसपाने एनडीएच्या उमेदवार द्रौपदी मुर्मू यांनाही पाठिंबा दिला होता.

मायावती यांनी ट्विट करून म्हटलंय की, देशाच्या सर्वोच्च राष्ट्रपतीपदाच्या निवडणुकीत सत्ता आणि विरोधी पक्षांमध्ये एकमत न झाल्यामुळे पुन्हा निवडणूक घेण्यात आली आहे. आता हीच परिस्थिती असल्याने उपाध्यक्षपदाची निवडणूकही 6 ऑगस्टला पार पडत आहे. अशा परिस्थितीत व्यापक जनहित आणि उपाध्यक्षपदासाठी होणाऱ्या निवडणुकीत आपली वाटचाल लक्षात घेऊन जगदीप धनखड यांना पाठिंबा देण्याचा निर्णय घेतला असल्याची घोषणा त्यांनी केली आहे.

दरम्यान, मागील काही दिवसांपूर्वी राष्ट्रपतीपदाच्या निवडणुकीदरम्यान बहुजन समाज पक्षाच्या प्रमुख मायावती यांनी पत्रकार परिषद घेऊन एनडीएच्या उमेदवार द्रौपदी मुर्मू यांना पाठिंबा जाहीर केला होता. एनडीएच्या राष्ट्रपतीपदाच्या उमेदवार द्रौपदी मुर्मू यांना पाठिंबा देण्याचा निर्णय घेतल्याचे त्यांनी सांगितले होते. आम्ही हा निर्णय भाजप किंवा एनडीएच्या समर्थनार्थ किंवा विरोधकांच्या विरोधात नसून आमचा पक्ष आणि आंदोलन डोळ्यासमोर ठेवून घेतला आहे. बसपा दुर्बल, गरीब आणि उपेक्षित लोकांसाठी निर्णय घेत आहे, असंही त्या म्हणाल्या होत्या.