Chandrayaan 3 Update : भारताने चांद्रयान - ३ मोहीम यशस्वी करून जगभर आपला डंका वाजवला. चंद्राच्या दक्षिण ध्रुवावर उतरणारा भारत हा पहिला देश तर चंद्रावर उतरणारा चौथा देश बनला आहे. तर आज पंतप्रधान नरेंद्र मोदी यांनी बंगळुरू येथील इस्रो सेंटरमध्ये वैज्ञानिकांची भेट घेऊन त्यांना शुभेच्छा दिल्या आहेत. यावेळी एका वैज्ञानिकांनी चांद्रयानाच्या यशाचे क्रेडिट पंतप्रधानांंना दिले आहे.

चांद्रयान - ३ चे नेव्हिगेशन सिस्टम क्षेत्राचे उपमहाव्यवस्थापक आणि चांद्रयान - ३ च्या आयोजन समितीचा भाग असलेले FB सिंग यावेळी बोलताना म्हणाले की, "पंतप्रधान नरेंद्र मोदी यांनी आज इस्रोच्या शास्त्रज्ञांना खूप प्रेरणा दिली. आम्हाला आज त्यांच्यासारख्या नेत्याची गरज आहे. त्यांनी आम्हाला दूरदृष्टी दिली आहे."

"इस्रोकडे प्रतिभेची कमतरता नाही आणि आम्हाला अशा प्रेरणा देणाऱ्या नेत्याची गरज आहे, जे सक्षम आहेत. सध्याचे पंतप्रधान हे करत आहेत आणि ते आम्हाला चांगले मार्गदर्शन करत आहेत. त्यांच्या नेतृत्वाखाली देश चमत्कार घडवेल." असं एफबी सिंग माध्यमांशी बोलताना म्हणाले आहेत.

मोदी परदेशातून थेट बंगळूरमध्ये

पंतप्रधान नरेंद्र मोदी शनिवारी ग्रीसहून थेट बेंगळुरूला पोहोचले. येथे ते इस्रो टेलिमेट्री ट्रॅकिंग आणि कमांड नेटवर्क मिशन कंट्रोल कॉम्प्लेक्समध्ये पोहोचले आणि इस्रो प्रमुख एस. सोमनाथ आणि इतर शास्त्रज्ञांची भेट घेऊन त्यांना शुभेच्छा दिल्या.

चांद्रयान - ३ ज्या ठिकाणी उतरले त्या ठिकाणाला शिवशक्ती असं नाव

भारताने चंद्रावर पहिलं यान पाठवून अंतराळ क्षेत्रात सर्वोत्तम कामगिरी केली आहे. चंद्राच्या दक्षिण ध्रुवावर अजून एकही देश पोहोचला नसताना भारताने पहिल्याच प्रयत्नात हे मिशन यशस्वी केले. त्यामुळे चांद्रयान -३ चे लँडर ज्या ठिकाणी उतरले त्या ठिकाणाला "शिवशक्ती" आणि चांद्रयान - २ ज्या ठिकाणी क्रॅश झाले होते त्या ठिकाणाला "तिरंगा" असं नाव देण्याची घोषणा पंतप्रधान नरेंद्र मोदी यांनी केली आहे.

२३ ऑगस्ट रोजी साजरा होणार राष्ट्रीय अंतराळ दिवस

२३ ऑगस्ट रोजी भारताना उत्तम कामगिरी केली आहे. त्यामुळे २३ ऑगस्ट हा दिवस राष्ट्रीय अंतराळ दिवस म्हणून साजरा केला जाणार असल्याची मोठी घोषणा पंतप्रधान नरेंद्र मोदी यांनी यावेळी बोलताना केली आहे.