सिक्किममध्ये काही दिवसांपू्र्वी आलेल्या भीषण पुराचे मुख्य कारण हे तापमान वाढ, ग्लेशियर वितळणे, मोठ्या प्रमाणात होणारा पाऊस, अनियंत्रीत पद्धतीने केलेली बांधकामे आणि प्रदुषण असल्याची बाब समोर आली आहे. वेगाने होत असलेला हवामान बदल हे या आपत्तीमागचे सर्वात मोठे कारण असल्याचे शास्त्रज्ञांचे म्हणणे आहे. हिमालयातील हि सरोवरांची संख्या वाढल्याने अशी आणखी संकटे येऊ शकतात, असा इशारा शास्त्रज्ञांनी दिला आहे.

या महिन्याच्या सुरूवातीलाच सिक्किम येथे अचानक पूर आल्याने हजारो लोक विस्थापीत झाले होते, या पुरांमध्ये अनेक घरांचे नुकसान होऊन बऱ्याच लोकांना जीव देखील गमवावा लागला होता.तज्ज्ञांचे म्हणणे आहे की हिमाचल प्रदेश, अरुणाचल प्रदेश आणि जम्मू काश्मीरसह अन्य हिमालयाच्या प्रदेशातील राज्यांमध्ये देखील हा धोका उद्भवू शकतो. हिमसरोवर वितळल्याने येणारा पूर (Glacial lake outburst flood) हा मोराइन धरणांच्या अपयशामुळे आल्याचे देखील तज्ज्ञांचे म्हणणे आहे.

पर्यावरण विशेषज्ञ अंजल प्रकाश यांनी हिंदी वृत्तवाहिनीला दिलेल्या माहितीनुसार, अशा प्रकारचा धोका असलेल्या प्रदेशांमध्ये हिमाचल प्रदेश, जम्मू काश्मीर, उत्तराखंड आणि अरुणाचल प्रदेश यांचा समावेश आहे. जागतीक तापमानवाढीमुळे बर्फ वितळून हिमसरोवरांचा आकार वाढत आहेत.

तसेच जीएलओएफचे मुख्य कारण हे ग्लेशियर वेगाने वितळणे असल्याचे सांगितले जाते आणि ग्लेशियर वितळणे हा मानवनिर्मीत प्रदुषण आणि अनियंत्रीत बांधकामे यामुळे होणाऱ्या तापमान वाढीचा परिणाम आहे. भूकंप आणि ब्लॅक कार्बन उत्सर्जन अशा कारणामुळे देखील जीएलओएफचा धोका वाढतो.