बंगळूर : कर्नाटकातील सिद्धरामय्या यांच्या नेतृत्वाखालील काँग्रेस सरकार (Congress Government) पुढील वर्षी होणाऱ्या लोकसभा निवडणुकीपूर्वी (Loksabha Election) कोसळेल, कारण सत्ताधारी पक्षाचे सुमारे २५ आमदार राजीनामा देण्याच्या तयारीत आहेत, असे भाकीत भाजपचे ज्येष्ठ आमदार बसनगौडा पाटील-यत्नाळ यांनी सोमवारी केले.

बसनगौडा (Basangouda Patil-Yatnal) म्हणाले, “१३५ जागा मिळाल्या म्हणणाऱ्या काँग्रेसला झोप येत नाही. ३० आमदार बाहेर गेले तर सरकार पडेल. २५ आमदार तयार आहेत. काही मंत्री सर्वाधिकार मिळाल्यासारखे वागत आहेत आणि अधिकाऱ्यांची हकालपट्टी किंवा बदल्या करत आहेत.

बसवराज रायरेड्डी यांच्यासारख्या ज्येष्ठ काँग्रेस आमदारांनी कर्नाटक हे 'भ्रष्ट राज्य' बनल्याबद्दल नाराजी व्यक्त केली आहे. मंत्र्यांच्या कार्यपद्धतीबाबत नुकत्याच झालेल्या विधिमंडळ पक्षाच्या बैठकीत व्यक्त केलेल्या नाराजीकडे लक्ष वेधून यत्नाळ म्हणाले की, त्यांचे स्वतःचे आमदार असे बोलत आहेत.