बंगळूर : काँग्रेसचे आमदार सरकारवर नाराज आहेत. त्यामुळे राज्यातील कॉंग्रेस सरकार (Congress Government) कोणत्याही क्षणी कोसळेल, असे भाकीत माजी मुख्यमंत्री व खासदार जगदीश शेट्टर (Jagadish Shettar) यांनी केले. मुख्यमंत्री आणि उपमुख्यमंत्री पदाच्या चर्चेसंदर्भात हुबळी येथे ते म्हणाले की, ''आमदार सरकारविरोधात नाराजी दर्शवत आहेत. म्हणजेच लोकसभा निवडणुकीनंतर काँग्रेस सरकारमधील अंतर्गत संघर्ष वाढत चालला आहे. कधीही काहीही होऊ शकते.''

ते पुढे म्हणाले, सरकारही पडू शकते. काँग्रेसच्या आमदारांमुळेच राज्य सरकार पडणार आहे. मात्र, कधी ते सांगता येणार नाही. राज्य सरकार आपल्या चुका झाकण्यासाठी भाजपकडे (BJP) बोट दाखवत आहे. सरकारमधील घोटाळे झाकण्याचे काम सरकार करत आहे. वाल्मिकी निगम घोटाळ्यात फक्त नागेंद्र यांना पद सोडावे लागले. बाकी काहीही झाले नाही.

बनावट प्रकरणाचा तपास सुरू आहे; पण त्याच्याकडून फार अपेक्षा ठेवू नका. सरकारने हे प्रकरण गांभीर्याने घेतलेले नाही. उपमुख्यमंत्री बदलाबाबत केवळ मुख्यमंत्रीच संभ्रम निर्माण करत असल्याचा टोला त्यांनी लगावला. सिद्धरामय्या यांचे हात बांधण्याचे काम सुरू आहे. सिद्धरामय्या यांना हाताशी धरल्याने राज्यात अस्थिर सरकार येईल. अशा स्थितीमुळे सरकारचेही नुकसान होणार आहे, असेही ते म्हणाले.