दिंडीगुलचे काँग्रेस जिल्हाध्यक्ष मणिकंदन (Dindigul Congress President Manikandan) यांचा गुरुवारी आंदोलनादरम्यान संयम सुटला.

राहुल गांधींना (Rahul Gandhi) शिक्षा देणाऱ्या न्यायाधीशाची (Judge) जीभ कापण्याची धमकी त्यांनी दिली. आम्ही सत्तेत आल्यावर राहुल गांधींना तुरुंगात पाठवण्याचा निकाल देणाऱ्या न्यायाधीशाची जीभ कापून टाकू, अशी धमकी त्यांनी 6 एप्रिल रोजी आंदोलनादरम्यान दिली होती.

मणिकंदन यांच्याविरुद्ध गुन्हा दाखल

दिंडीगुल पोलिसांनी (Dindigul Police) सांगितलं की, या प्रकरणी मणिकंदन यांच्याविरुद्ध आयपीसी 153B सह तीन कलमांतर्गत गुन्हा दाखल करण्यात आलाय. याबाबत अधिक तपास करण्यात येत आहे.

तामिळनाडूतील दिंडीगुल इथं काँग्रेस नेते राहुल गांधी यांच्या अपात्रतेच्या विरोधात निदर्शनं करण्यात आली. यादरम्यान जिल्हाप्रमुख मणिकंदन म्हणाले, 23 मार्च रोजी सुरत न्यायालयाच्या न्यायाधीशांनी आमचे नेते राहुल गांधी यांना दोन वर्षांची शिक्षा सुनावली. यावेळी त्यांनी न्यायमूर्ती एच वर्मा यांना उद्देशून म्हटलं, जेव्हा काँग्रेस सत्तेवर येईल तेव्हा आम्ही तुमची जीभ कापून टाकू, अशी धमकी दिली.

काय आहे प्रकरण?

23 मार्च रोजी सुरतच्या CJM न्यायालयानं राहुल यांना 2019 मध्ये 'मोदी आडनावा'बाबत केलेल्या टिप्पणीप्रकरणी कलम 504 अंतर्गत दोन वर्षांची शिक्षा सुनावली होती. मात्र, न्यायालयानं या निर्णयाची अंमलबजावणी करण्यासाठी 30 दिवसांची मुदतही दिली होती. 2019 च्या लोकसभा निवडणुकीदरम्यान कर्नाटकातील कोलार इथं एका सभेत राहुल गांधी म्हणाले होते, 'सर्व चोरांचे आडनाव मोदी कसे आहे?' या संदर्भात भाजपचे आमदार आणि गुजरातचे माजी मंत्री पूर्णेश मोदी यांनी राहुल गांधी यांच्यावर मानहानीचा खटला दाखल केला होता. त्यानंतर राहुल गांधींना सुरत कोर्टातून जामीन मिळाला.