Dhiraj Sahu On IT Raid:  सहा डिसेंबर रोजी इन्कम टॅक्स विभागाने काँग्रेसचे खासदार धीरज साहू यांच्याशी संबंधीच ठिकाणांवर छापेमारी केली. या छाप्यांमध्ये पैशांनी भरेलेले तब्बल १७६ बॅग सापडले आहेत. ही रक्कम मोजण्यासाठी ४० मशीन पाच दिवस काम सुरू होतं. या मोजणीत काँग्रेस खासदाराकडे ३५३ कोटी रुपये सापडल्याचे समोर आले. या छापेमारीनंतर पहिल्यांदाच धीरज साहू हे कॅमेऱ्यासमोर आले. साहू यांनी अखेर हा पैसा कोणाचा आहे, याबद्दल खुलासा केला आहे. सोबतच हे काळा पैसा आहे का याबद्दल देखील उत्तर दिलं आहे.

भाजपकडून सापडलेला पैसा काळं धन असल्याचा आरोप केला जातो आहे, याबद्दल धीरज साहू यांना विचारण्यात आलं तेव्हा साहू यांनी सांगितलं की, आमचे जेवढे उद्योग आहेत, त्या सगळ्या फर्म माझ्या कुटुंबियांच्या नावावर आहेत. ते लोक (भाजप) याला कसे काळा पैसा म्हणत आहेत याबद्दल इनकम टॅक्स विभागच सांगू शकतो. तो काळा पैसा की पांढरा याबद्दल इनकम टॅक्स विभागाचं उत्तर येऊ द्या. मी बिझनेस करत नाही... माझ्या कुटुंबातील लोक याची उत्तरं देतील. मी या प्रकरणातून पूर्णतः दूर आहे. माझं कुटुंब खूप मोठं आहे. मी राजकारणात ३०-३५ वर्षांपासून आहे. याखेरीज मला अधिक काहीच बोलायचं नाही.

धीरज साहू यांना या छापेमारीचा काँग्रेस पक्षासी संबंध आहे का, असा प्रश्न विचारण्यात आला, यावर बोलताना त्यांनी उत्तर दिलं की, हा इनकम टॅक्सचा झापा आहे. लोक याकडे कशा पद्धतीने पाहात आहेत माहिती नाही. मी कुठल्याही पक्षावर आरोप लावत नाहीये.मात्र मी सांगू शकतो की हा पैसा काँग्रेस पक्षाचा किंवा दुसऱ्या कुठल्या पक्षाचा नाहीये, आणि मी हे मी ठामपणे सांगत आहे.

इनकम टॅक्स विभागाने खासदार धीरज साहू यांच्याशी संबंधीत अनेक ठिकाणांवर छापेमारी केली होती. हे छापे तीन राज्यात मारण्यात आले. या छाप्यांनंतर एकूण ३५३ कोटी रुपये जमा करण्यात आले आहेत. भारताच्या इतिहासात पहिल्यांदाच एकाच कारवाईत इतक्या मोठ्या प्रणाणावर पैसे जप्त करण्यात आले आहेत. या छापेमारीनंतर धीरज साहू यांनी पहिल्यांदाच वक्तव्य केलं असून त्यांनी हा पैसै आपल्या कुटुंबियांचा असल्याचे म्हटले आहे.