श्रीनगरः राहुल गांधींनी कन्याकुमारी ते काश्मीर अशी ४० हजार किलोमीटरची भारत जोडो यात्रा केली आहे. या यात्रेच्या समारोपानंतर राहुल गांधी यांनी थेट केंद्रीय गृहमंत्री अमित शाह यांना चॅलेंज केलं.

श्रीनगर येथे आज राहुल गांधी म्हणाले की, जम्मू-काश्मीरमध्ये टार्गेट किलिंग आणि बॉम्बस्फोट होत आहेत. जर सुरक्षा व्यवस्था एवढी तगडी आहे तर भाजप लाल चौकातून जम्मूपर्यंत यात्रा का करत नाही?

राहुल पुढे म्हणाले की, गृहमंत्री अमित शाह जम्मू ते काश्मीर अशी यात्रा का करत नाहीत? त्यांनी यात्रा करुन दाखवावी. मला वाटतंय की, येथे सुरक्षा व्यवस्था ठीक नाही. मी जम्मू काश्मीरमध्ये जे काही बघतोय ते पाहून दुःखी आहे.

चीनसोबत सुरु असलेल्या वादावरुन राहुल गांधींनी केंद्र सरकारवर गंभीर आरोप केले आहेत. ते म्हणाले, मी निवृत्त जवान आणि लडाखवासियांना भेटलो, त्यावरुन चीनने आपली दोन हजार वर्ग किलोमीटर जमीन बळकावल्याचं समोर आल्याचं स्पष्ट होत आहे. भारताचे अनेक पेट्रोलिंग पॉईंटस् आता चीनच्या ताब्यात आहेत. सरकारने हे नाकारलं तर चीनचं आत्मबल वाढेल, असं राहुल गांधी म्हणालेत.

काँग्रेसची भारत जोडो यात्रा जम्मू-काश्मीरमध्ये आहे. श्रीनगरच्या ऐतिहासिक लाल चौकात राहुल गांधींनी तिरंगा फडकवला आहे. यावेळी त्यांच्यासोबत काँग्रेसच्या सरचिटणीस प्रियांका गांधी उपस्थित होत्या.

यावेळी राष्ट्रगीत गात राहुल गांधी यांनी ध्वजारोहण केले. यानंतर श्यामलाल गुप्ता यांचं प्रसिद्ध गीत, विजय विश्व तिरंगा प्यारा हे गायले. काँग्रेसची भारत जोडो यात्रा कन्याकुमारीपासून सुरू झाली होती.

आता ती जम्मू-काश्मीरमध्ये संपणार आहे. आज कडक बंदोबस्तात राहुल गांधी यांनी लाल चौकात ध्वजारोहण केले. राहुल श्रीनगरमधूनच आज 5.30 वाजता पत्रकार परिषद घेतली.